कम्प्यूटर म निःशुल्क आवासीय प्रशिक्षण ले आज हर महिना कमावत हे 10 हजार रुपिया स्वंय के रोजगार प्रांरभ करके अपन दुकान म ही एक अऊ युवती ल देहे हे रोजगार
जशपुरनगर, जिला म बेरोजगार युवक-युवति मन ल रोजगार प्रदान करे बर कई माध्यम ले प्रशिक्षण प्रदान करके ओ मन ल रोजगार ले जोड़े जात हे। इही कड़ी म मुख्यमंत्री कौशल विकास प्राधिकरण कोति ले पाछू बछर कम्प्यूटर प्रशिक्षण के आयोजन करके निःशुल्क प्रशिक्षण प्रदान करे गीस। जेखर लाभ उठाके दुलदुला विकासखंड के कुमारी प्रीति साहू ह 3 महिना के आवासीय प्रशिक्षण प्राप्त करके कम्प्यूटर के क्षेत्र म दक्ष होके स्वंय के रोजागर चालू करे हे। जेखर से प्रीति आज हर महिना 10 हजार रुपए तक के आर्थिक आमदनी अर्जित करत हे।
कुमारी प्रीति ह बताइस कि वो ह अपन पढ़ई दुलदुला म ही रहिके करे हे। ओ ह हमेशा ले व्यवसाय ले जुड़ना चाहत रहिस फेर वोखर पास कोनो विशेष क्षेत्र म गियान नइ रहिस ते पाए के ओ ह न तो व्यवसाय कर पात रहिस न कोनो नौकरी। वोकर बताती जइसनहे ओ ल पता चलिस कि मुख्यमंत्री कौशल विकास के तहत् निःशुल्क आवासीय प्रशिक्षण देके युवा मन के कौशल ल बढ़ाए जात हे। वो ह कम्प्यूटर ट्रेड म 3 महिना के प्रशिक्षण प्राप्त करे बर पंजीयन कराइस अऊ निःशुल्क आवासीय प्रशिक्षण प्राप्त करिस।
कुमारी प्रीति बताइस कि अब ओ प्रशिक्षण ले कम्प्यूटर म दक्ष हो गए हे। प्रशिक्षण के समय ओ ल कम्प्यूटर ले संबंधित सबो जरूरी जानकारी प्रदान करे गीस। जेखर लाभ उठात प्रीति ह दुलदुला म एक दुकान के माध्यम ले कम्प्यूटर सेंटर चालू करिस। जेखर से ओ ल अब रोजेच 400-500 रुपए के आमदनी हो जात हे। वो अपन कम्प्यूटर सेंटर म कम्प्यूटर सेटअप, फोटोकापी, इंटरनेट वर्क, रिचार्ज, ऑनलाईन टिकट संग आन काम के सेवा देवत हे।
प्रीति ह कौशल विकास ले प्रशिक्षण प्राप्त करके न सिरिफ अपन आर्थिक स्थिति ल सुदृ़ढ़ करे हे। भलुक अपन दुकान म लाईवलीहुड कॉलेज ले प्रशिक्षण प्राप्त करे एक अऊ युवती ल दुकान म काम करे बर रखे हे। जेखर से अपन संगेच एक अऊ युवती ल रोजगार प्राप्त होए हे। प्रीति आज अपन जइसे युवक युवती मन बर प्रेरणा बन गए हे। प्रीति अब आन बेरोजागर युवक-युवती मन ल घलोक रोजगार ले जुड़े बर अपन कौशल बढ़ाए के सलाह देथे। जेखर से ओ मन ल घलोक प्रीति के जइसे कौशल ले रोजगार प्राप्त हो सकय।