मुख्यमंत्री स्लम स्वास्थ्य योजना ले घर तीर ही मिलत हे मुफत ईलाज के सुविधा

बिलासपुर, मुख्यमंत्री श्री भूपेश बघेल कोति ले शहरी क्षेत्र के स्लम इलाका मन म रहइया गरीब परिवार बर निःशुल्क उपचार के व्यवस्था करे गए हे। उमन ये योजना शुरू करके गरीब जनता मन के सुध लेहे हें। ये योजना ले स्लम क्षेत्र मन म रहइया मनखे मन के कपार ले चिंता के एक बड़का लकीर मिट गए हे। मुख्यमंत्री शहरी स्लम स्वास्थ्य योजना के माध्यम ले मोबाइल मेडिकल यूनिट जिला के अलग-अलग वार्ड मन म पहुंच के मनखे मन के इलाज करत हे। ये योजना के तहत स्लम क्षेत्र के निवासी मन के स्वास्थ्य के जांच, उपचार, दवा वितरण अउ स्वास्थ्य परामर्श सुविधा निःशुल्क देहे जात हे। यूनिट म ओपीडी, प्रयोगशाला जांच के संग दवा वितरण अऊ लैब म 41 प्रकार के स्वास्थ्य जांच के सुविधा हवय। योजना के तहत डॉक्टर, नर्स,अऊ आन मेडिकल स्टाफ अउ दवई संग मोबाईल मेडिकल यूनिट स्लम क्षेत्र मन म पहुंचत हे।
बिलासपुर के मल्हार नगर पंचायत के वार्ड नंबर 04 केंवट पारा म मुख्यमंत्री स्लम स्वास्थ्य योजना के तहत लगाए गए शिविर म अपन ईलाज कराए आए मुकेश साहू मजदूरी करके अपन परिवार के भरण पोषण करथे। प्राईवेट अस्पताल के खरचा वहन कर पाना वोखर बर मुश्किल हे। शिविर म ओखर ईलाज मुफ्त म हो गे। ओ बताईस कि ओ ल अस्पताल के चक्कर घलोक नइ काटे ल परिस अऊ ईलाज म कुछु खरचा घलोक नइ करना परिस। अहिल्या केंवट ल पाछू कुछ दिन ले कमजोरी महसूस होवत रहिस। अहिल्या बाई ल हाई ब्लड प्रेशर अऊ माड़ी म पीरा रहिस। तिहार बाई ल हाथ पैर म झुनझुनी अऊ कमजोरी के तकलीफ रहिस। शिविर म ओ मन ल दवई के संग टॉनिक घलोक दे गीस। ये सबो मनखे अपन उपचार बर अस्पताल तो जाना चाहत रहिन, फेर काम के व्यस्तता के सेती नइ जा पात रहिन। इंकर घरे तीर जब मुख्यमंत्री शहरी स्लम स्वास्थ्य योजना के अंतर्गत संचालित मोबाइल मेडिकल यूनिट पहुंचीस त ए सबो के बीमारी मानों दूरेच हो गे। मोबाइल मेडिकल यूनिट म मौजूद चिकित्सक अऊ स्वास्थ्य विभाग के टीम ह वार्ड के मनखे मन के स्वास्थ्य जांच करके ओ मन ल दवई दीस त सबो ल बीमारी ले राहत मिलीस। पहिली छोटे-छोटे बीमारी के इलाज बर अस्पताल नइ जा पवइया ए मनखे मन ह कई पइत निजी अस्पताल के चक्कर घलोक काटिन अऊ अपन पइसा घलोक खरचा करे रहिन।
बिलासपुर शहर के कई ठन वार्ड म ये योजना के तहत लगइया शिविर मन म सैकड़ों के संख्या म मनखे अपन बीमारी मन के निःशुल्क ईलाज कराए पहुंचत हें। ओ मन एखर बर मुख्यमंत्री श्री भूपेश बघेल के हिरदे ले आभार घलोक व्यक्त करत हें।