राजा अपन परजा के सुख खातिर मांगिन दान : कहिन छेर-छेरा माई कोठी के धान ल हेर-हेरा
Surabhi Tiwari
छत्तीसगढ़ के अस्मिता अउ महान परम्परा ल निभावत मयारू मुख्यमंत्री श्री भूपेश बघेल
मुख्यमंत्री संघरिन छेर छेरा जोहार कार्यक्रम म : कहिन महु मांगे बर आए हंव
मुख्यमंत्री ह अन्न दान के महापर्व म घर-घर जाके लीन दान
मुख्यमंत्री ल महंत राजेश्री रामसुन्दर दास ह धान संग सवा लाख के चेक करिस दान
मुख्यमंत्री ह दान म मिले राशि अऊ धान ल सुपोषण अभियान बर करिन समर्पित
रायपुर, मुख्यमंत्री श्री भूपेश बघेल आज राजधानी रायपुर के ऐतिहासिक अउर प्राचीन दुधाधारी मठ म आयोजित अन्नदान के महापर्व छेर छेरा जोहार कार्यक्रम म सामिल होइन अऊ कहिन कि महु छेर छेरा मांगे बर आए हंव।
मुख्यमंत्री ह दुधाधारी मंदिर पहुंचके भगवान संकट मोचन हनुमान, स्वामी बालाजी भगवान अऊ राम दरबार म पूजा-अर्चना करिन अऊ प्रदेशवासी मन के खुशहाली के कामना करिन। मुख्यमंत्री ल महंत राजेश्री रामसुन्दर दास ह छेर छेरा तिहार के बेरा म धान अउर सवा लाख रूपिया के चेक प्रदान करिन। मुख्यमंत्री श्री बघेल ह रंग बिरंगा कुरथा म सजे डण्डा, पंथी अऊ राउत नर्तक दल मन के संग मंदिर के तीर के कई घर म जाके छेर छेरा पुन्नी के दान लीन। मुख्यमंत्री ह घर के आगू ‘छेर छेरा माई कोठी के धान ला हेर हेरा‘ के अवाज लगाईन। मंदिर परिसर म महंत राजेश्री रामसुन्दर दास अऊ साधु संत अऊ पंडित मन ह मंत्रोंच्चार के संग मुख्यमंत्री श्री बघेल ल धान ले तौलके तुला दान करिन। मुख्यमंत्री ह अन्नदान ल मठ के रामकोठी म रखिन।
मुख्यमंत्री ह दान म मिले धान अऊ धन राशि ल प्रदेश के लइका मन ल स्वस्थ बनाए बर चलाए जात सुपोषण अभियान बर समर्पित करिन। मुख्यमंत्री ह कहिन कि प्रदेश म कुपोषण सबले बड़े समस्या हे। कुपोषण दूर करे बर सरकार के संग समाज अऊ जन भागीदारी जरूरी हे तभे कुपोषण ले मुक्ति पाए जा सकत हे। उमन प्रदेश के मनखे मन ले आव्हान करिन कि सुपोषण अभियान म तन-मन-धन ले सहयोग करव।
मुख्यमंत्री श्री बघेल ह प्रदेशवासी मन ल छेर छेरा पर्व के बधाई अऊ शुभकामना देवत कहिन कि प्रदेश के किसान जब धान के फसल खलिहान म लाथे अऊ ओखर मिंजाई करके जब रास बांधथे तब किसान संग सबो मनखे प्रसन्न होथे। पौष पूर्णिमा के दिन मनाए जाय वाला छेर छेरा पुन्नी म गांव के लइका, युवा अऊ महिला संगठन खलिहान अऊ घर मन म जाके धान अऊ भेंट स्वरूप पइसा सकेलथें अऊ सकेले धान अऊ धन ल रामकोठी म रखथें अऊ साल भर बर अपन कार्यक्रम बनाथें। खेल के सामान अऊ सार्वजनिक आयोजन मन बर सामान खरीदथें। मुख्यमंत्री ह कहिन कि छत्तीसगढ़ के किसान बहुत उदार होथे। किसान मन कोति ले उत्पादित फसल केवल ओखरे बर नहीं भलुक समाज के अभावग्रस्त अऊ जरूरतमंद मनखे, कामगार अऊ पशु-पक्षी बर घलोक काम आथे। मुख्यमंत्री ह कहिन कि पौराणिक मान्यता के अनुसार आजे के दिन भगवान शंकर ह माता अन्नपूर्णा ले भिक्षा मांगे रहिस, आजेच मां शाकम्भरी जयंती हे। ए खातिर मनखे धान के संग साग-भाजी, फल के दान घलोक करथे। श्री बघेल ह कहिन कि आजे के दिन रतनपुर के राजा छै महिना के प्रवास के बाद रतनपुर लहुटे रहिन। उंखर आवभगत म प्रजा ल दान दे गए रहिस।
छेर छेरा पुन्नी जोहार कार्यक्रम म पद्मश्री श्रीमती ममता चन्द्राकार ह छत्तीसगढ़ी राज गीत प्रस्तुत करिस। संगेच ही कार्यक्रम म बिहाव गीत संग आन गीत मन के मधुर प्रस्तुति दिए गीस।
ये बेरा म कृषि मंत्री श्री रविन्द्र चौबे, आदिम जाति विकास मंत्री डॉ. प्रेमसाय सिंह टेकाम, महिला अउर बाल विकास मंत्री श्रीमती अनिला भेंड़िया, सांसद श्रीमती छइंहा वर्मा, विधायक श्री धनेन्द्र साहू, श्री कुलदीप जुनेजा, श्री विकास उपाध्याय, रायपुर नगर निगम के महापौर श्री एजाज ढेबर, सभापति श्री प्रमोद दुबे, मुख्यमंत्री के सलाहकार श्री प्रदीप शर्मा अऊ श्री विनोद वर्मा, मुख्यमंत्री के प्रमुख सचिव श्री गौरव द्विवेदी संग संस्कृति विभाग, जनसम्पर्क विभाग के अधिकारी अऊ लोक कला दल के कलाकार अउर अड़बड़ झन मनखे मौजूद रहिन।
