मुख्यमंत्री शहरी स्लम स्वास्थ्य योजना ले 19 लाख मरीज होइन लाभान्वित

रायपुर, छत्तीसगढ़ के शहरी क्षेत्र मन म मुख्यमंत्री शहरी स्लम स्वास्थ्य योजना ले स्लम क्षेत्र म रहइया जरूरतमंद मनखे मन के ईलाज मोबाइल मेडिकल यूनिट ले करे जात हे। छोटे-छोटे बीमारी बर अपन काम धंधा बंद करके डाक्टर ले अपॉइंटमेंट लेहे अऊ लाइन म लग के इलाज कराए म गरीब मन ल होत दिक्कत ल ध्यान रखत शुरू करे गए मुख्यमंत्री शहरी स्लम स्वास्थ्य योजना अब अपन उद्देश्य अऊ लक्ष्य मन ल न सिरिफ पूरा करत हे, भलुक मुहल्ला म ही कैंप लगे ले मनखे मन ल इलाज कराए म सहूलियत होए हे। गरीब अऊ जरूरतमंद मनखे ल अब बीमार पड़े म इलाज बर भटकना नइ परय।
मुख्यमंत्री शहरी स्लम स्वास्थ्य योजना अंतर्गत गरीब परिवार के दिल जीतत हे। मनखे मन ल तुरंत इलाज के सुविधा मिले ले ओ मन छत्तीसगढ़ सरकार ये स्वास्थ सुविधा बर करे गए पहल के सराहना करत हें। मुख्यमंत्री श्री भूपेश बघेल के दिशा-निर्देशन म अउ नगरीय प्रशासन मंत्री डॉ. शिवकुमार डहरिया के निगरानी म 1 नवंबर 2020 ल प्रदेश के 14 नगर पालिक निगम मन म चालू होए रहिस। अब एकर फायदा छत्तीसगढ़ के सबो नगरीय निकाय मन के मनखे मन ल देहे जात हे। ये योजना ले अब तक करीब 19 लाख मरीज के उपचार हो चुके हे। मोबाइल मेडिकल यूनिट अंतर्गत लगइया कैम्प अऊ स्वास्थ्य लाभ प्राप्त करइया मन के संख्या देखे जाय त हर महिना एक लाख ले जादा मरीज मोबाइल मेडिकल यूनिट के माध्यम ले इलाज करावत हें। मोबाइल मेडिकल यूनिट के संग तीन लाख 71 हजार 458 मनखे मन के लेब टेस्ट अउ 15 लाख 61 हजार 281 मरीज मन ल निःशुल्क दवा वितरण करे गए हे। अइसनहे दाई-दीदी क्लीनिक म करीबन 91 हजार महिला मन के इलाज करे गए हे।