- स्लम बस्ती मन के मनखे मन ल निःशुल्क स्वास्थ्य जांच, उपचार अउ दवई
- मोबाइल मेडिकल यूनिट के माध्यम ले अब तक 31740 कैम्प आयोजित
- 4 लाख 45 हजार ले जादा मरीज मन के होइस पैथालॉजी जांच
- एम.एम.यू के माध्यम ले अब तक 18 लाख 38 हजार ले जादा मरीज मन ल देहे गीस निःशुल्क दवइ
रायपुर, छत्तीसगढ़ के शहरी क्षेत्र मन के स्लम बस्ती मन म निवास करत मनखे मन ल घर पहुंच स्वास्थ्य सुविधा मुहैया कराए के उद्देश्य ले छत्तीसगढ़ शासन के नगरीय प्रशासन अउ विकास विभाग कोति ले संचालित मुख्यमंत्री शहरी स्लम स्वास्थ्य योजना के तहत अब तक मोबाइल मेडिकल टीम कोति ले 22 लाख 42 हजार 235 मनखे मन ल निःशुल्क इलाज मुहैया कराए गए हे। एखर तहत राज्य के 169 नगरीय निकाय के स्लम बस्ती मन म अब तक मोबाइल मेडिकल यूनिट टीम कोति ले 31 हजार 740 कैम्प लगाके मनखे मन के निःशुल्क जांच अऊ उपचार करके दवई देहे गए हे। नगरीय प्रशासन अउ विकास मंत्री डॉ. शिवकुमार डहरिया ह विभागीय अधिकारी मन ल निर्देश देहे हें कि नगरीय क्षेत्र मन के तंग बस्ती मन के अउ आन जरूरत मंद मनखे मन के स्वास्थ्य परीक्षण करके ओ मन ल निशुल्क दवई देहे जाए।
जानबा हे कि राज्य के 14 नगर निगम क्षेत्र मन के स्लम बस्ती मन म रहइया मनखे मन ल स्वास्थ्य सुविधा मुहैया कराए बर मुख्यमंत्री शहरी स्लम स्वास्थ्य योजना के पहिली चरण के शुरूआत 01 नवम्बर 2020 ले होए रहिस। एखर तहत 60 मोबाइल मेडिकल यूनिट ले स्लम बस्ती मन म जाके मनखे मन के स्वास्थ्य परीक्षण अऊ उपचार अउ दवा वितरण के शुरूआत करे गए रहिस। मुख्यमंत्री श्री भूपेश बघेल ह ये योजना ले मनखे मन ल घर पहुंच स्वास्थ्य सुविधा मिले के सफलता ल देखत 31 मार्च 2022 के एकर विस्तार पूरा राज्य के नगरीय निकाय क्षेत्र मन म करे गीस अऊ 60 अऊ नवा मोबाइल मेडिकल यूनिट शुरू करे गीस। ये योजना के तहत अब पूरा राज्य के नगरीय क्षेत्र मन के स्लम बस्ती मन म चिकित्सक, पैरामेडिकल टीम, मेडिकल उपकरण अउर दवई सहित 120 मोबाइल मेडिकल यूनिट पहुंचके मनखे मन ल स्वास्थ्य सुविधा मुहैया करावत हे। मुख्यमंत्री शहरी स्लम स्वास्थ्य योजना के तहत अब तक 4 लाख 45 हजार 661 मरीज मन ल पैथालॉजी टेस्ट के सुविधा मुहैया कराए के संग 18 लाख 38 हजार 804 ले जादा मरीज मन ल निःशुल्क दवई देहे गए हे। ये योजना के तहत लाभान्वित मरीज मन म 2 लाख 34 हजार 553 श्रमिक हे।
