भोजपुरी स्टार मनोज तिवारी अउ बॉलीवुड सिंगर कनिका कपूर के होही प्रस्तुति
एडवेंचर स्पोर्ट्स अउ सांस्कृतिक कार्यक्रम ले गुलजार होही छत्तीसगढ़ के शिमला
रायपुर, छत्तीसगढ़ के शिमला अउ छोटे तिब्बत के नाम ले जाने जात पर्यटन स्थल मैनपाट मा मुख्यमंत्री श्री विष्णु देव साय ह मैनपाट महोत्सव के सुभारंभ करहीं। ए महोत्सव ह रोपाखार जलाशय के तीर मा 13 ले 15 फरवरी तक आयोजित करे जाही। ए महोत्सव के आयोजन राज्य सासन के पर्यटन अउ संस्कृति विभाग अउ जिला प्रशासन डहार ले करे जात हे। सुभारंभ कार्यक्रम के अध्यक्षता पर्यटन मंत्री श्री राजेश अग्रवाल ह करहीं।
मैनपाट महोत्सव मा लोक गीत अउ संस्कृति के अजब संगम देखे ला मिलही। 13 फरवरी के भोजपुरी सुपरस्टार मनोज तिवारी ह अपन प्रस्तुति देहीं। ओकर संग छत्तीसगढ़ी गायक सुनील सोनी अउ ओडिशा के प्रसिद्ध छऊ नाच के प्रस्तुति होही। 14 फरवरी के छत्तीसगढ़ के सुप्रसिद्ध लोक गायिका अलका चंद्राकर अउ इंडियन आइडल फेम वैशाली रायकवार अपन सुरीली आवाज ले संझा ला यादगार बनाहीं। 15 फरवरी के महोत्सव के खास आकर्षण बॉलीवुड के मशहूर सिंगर कनिका कपूर होही। ओकर संग रायगढ़ घराना के कत्थक नृत्यांगना ज्योतिश्री वैष्णव अउ गायक आयुष नामदेव घलो प्रस्तुति देहीं। एखर संगे स्थानीय कलाकार अउ स्कूली लइका मन डहार ले घलो सांस्कृतिक कार्यक्रम पेश करे जाही।
जिला प्रशासन डहार ले मैनपाट महोत्सव के तैयारी आखिरी चरण मा हे। ए मऊका मा अलग-अलग सरकारी विभाग मन डहार ले विकास प्रदर्शनी लगाय जात हे, जिहाँ सासन के योजना मन अउ स्थानीय सामान मन जइसे टाऊ अउ तिब्बती हस्तशिल्प के प्रदर्शन होही। महोत्सव मा एडवेंचर एक्टिविटी मा सैलानी मन बर बोटिंग, साहसिक खेल अउ पारंपरिक दंगल के आयोजन करे जाही। महोत्सव जगा मा सुरक्षा, पार्किंग अउ सैलानी मन के सुविधा बर पूरा इंतजाम करे गे हे। फूड ज़ोन मा सरगुजा के पारंपरिक सुवाद अउ पकवान मन के आनंद लेहे जा सकही।
मैनपाट के प्रमुख आकर्षण
अंबिकापुर मुख्यालय ले लगभग 75 किलोमीटर दूर स्थित मैनपाट ह एक बहुत सुग्घर हिल स्टेशन आय, जेहा समुद्र तल ले 3,781 फीट के ऊँचाई मा हे। मैनपाट मा बड़का तिब्बती समाज बसे हे, जिहाँ के थाकपो शेडुप्लिंग मठ ह मुख्य आकर्षण आय।
जलजली– एहा एक भूगर्भीय अचरज आय जिहाँ जमीन ह दलदली हे अउ कूदे मा स्पंज के जइसे हिलथे, एला म्यूजिकल लैंड घलो कहे जाथे।
उल्टा पानी- इहाँ के पानी ह ढलान के उलटा दिसा मा बोहाथे, जेहा अभी तक एक अनसुलझा रहस्य आय। एखर अलावा टाइगर पॉइंट, मछली पॉइंट, मेहता पॉइंट, सरभंजा जलप्रपात जइसन कतको देखे लायक जगा हे।
