मुख्यमंत्री ह छेरछेरा म कई घर म जाके लीन अन्नदान : फूल के बरसा अऊ तिलक लगाके होइस स्वागत

रायपुर, छत्तीसगढ़ के कृषि प्रधान अर्थव्यवस्था म आज के दिन के विशेष महत्व हे। ग्रामीण अऊ शहरी क्षेत्र मन म ये पर्व आज बड़ उछाह ले मनाए गीस। मुख्यमंत्री श्री भूपेश बघेल ह घलोक ये पर्व म राजधानी रायपुर के मठपारा म दुधाधारी मठ के तीर-तखार के कई घर म जाके छेर छेरा पुन्नी के दान लीन।

मुख्यमंत्री ह घर के आगू ‘छेर छेरा, माई कोठी के धान ला हेर हेरा‘ के अवाज लगाईन। मनखे मन ह बड़ उछाह अऊ मया के संग मुख्यमंत्री के स्वागत करिन। घर के महिला मन ह मुख्यमंत्री उपर फूल के बरसा करिन अऊ तिलक लगाइन। महिला मन ह सूपा अऊ टुकनी म मुख्यमंत्री ल धान, साग-भाजी, फल-फूल अऊ लाड़ू के भेंट दीन। सियान महिला मन ह श्री बघेल ल अपन असीस दीन। श्री बघेल ह विनम्रता ले सबो ल धन्यवाद दीन। मुख्यमंत्री लोक नर्तक दल मन के संग दान लेहे निकले रहिन।

ये बेरा म दूधाधारी मठ के महंत राजेश्री रामसुंदर दास, कृषि मंत्री श्री रविन्द्र चौबे, आदिम जाति विकास मंत्री डॉ. प्रेमसाय सिंह टेकाम, नगरीय विकास मंत्री डॉ. शिव डहेरिया, महिला अउर बाल विकास मंत्री श्रीमती अनिला भेंड़िया, सांसद श्रीमती छइंहा वर्मा, विधायक श्री धनेन्द्र साहू, श्री कुलदीप जुनेजा अऊ श्री विकास उपाध्याय, महापौर श्री एजाज ढेबर घलोक ऊंखर संग रहिन।