रायपुर, 15 अगस्त 2020। मुख्यमंत्री श्री भूपेश बघेल ह राजधानी रायपुर के पुलिस मैदान म आयोजित स्वतंत्रता दिवस के मुख्य समारोह म प्रदेश के सबो कोरोना वारियर्स ल बधाई अऊ शुभकामना दीन। उमन कहिन के कोरोना संकट के समय प्रदेश म डॉक्टर, नर्स अऊ चिकित्सा सेवा अऊ सफाई संग आन जरूरी सेवा ले जुड़े मनखे मन ह अपन जान के बाजी लगाके कोरोना पीड़ित मन के उपचार करे हें अऊ सरलग करत हें। चिकित्सा बिरादरी ह ये साबित करे हें के ओ मन सही म धरती के भगवान यें। मैं चिकित्सा क्षेत्र ले जुड़े सबो मनखे मन ल हृदय ले धन्यवाद देवत हंव।
उमन कहिन कि कोरोना संकट के भयंकर त्रासदी के समय नागरिक सेवा, पानी, बिजली, सफाई, कानून व्यवस्था जइसे अत्यावश्यक सेवा मन म लगे पुलिस बल, कई सामाजिक संगठन अऊ निजी तौर म सेवा करत मनखे मन ह खांध ले खांध मिलाके काम करे हें। प्रदेश के मनखे मन ह जाति, धर्म, सम्प्रदाय अऊ अमीर-गरीब के सीमा मन ले ऊपर उठके पीड़ित मानवता के सेवा बर पूरा संवेदनशीलता अऊ साहस के परिचय दीन। अइसन मनखे मन के संख्या हजारों म हे, जेमा ले चिनहारी स्वरूप कुछ मनखे मन के सम्मान, समारोह म करे जात हे। सही म ये सम्मान संकट के दौर म हमर एकजुटता के घलोक सम्मान ये। मैं अपन कोति ले सरकार के तरफ ले अऊ प्रदेश के पौने तीन करोड़ जनता के तरफ ले सबो कोरोना वारियर्स के अभिनंदन करत हंव।
