बिलासपुर, 26 अक्टूबर 2020। मुख्यमंत्री के सलाहकार श्री प्रदीप शर्मा ह आज कोटा विकासखंड के कई ठन गौठान मन के दउरा करिन। उमन गोधन न्याय योजना के क्रियान्वयन के जायजा लीन अऊ गौठान मन म आर्थिक गतिविधि मन ल बढ़ाके ए मन ल ग्रामीण उद्योग पार्क के रूप म विकसित करे के संभावना मन उपर चर्चा करिन। ये बेरा म ऊंखर संग कलेक्टर डॉ. सारांश मित्तर घलोक उपस्थित रहिन।
श्री शर्मा आदिवासी बहुल ग्राम पंचायत मोहदा अऊ कंचनपुर के गौठान मन म तको पहुंचिन। ग्राम मोहदा के गौठान म गोधन न्याय योजना के क्रियान्वयन ल देखिन। इहां प्रगति स्व-सहायता समूह के महिला मन ह 15 वर्मी टैंक अऊ 5 नाडेफ टैंक म वर्मी कम्पोस्ट खाद बनावत हें। उमन अभी तक 31 क्विंटल वर्मी खाद बनाए हें, जेमां ले 20 क्विंटल खाद वन विभाग ल तको बेच डरे हें। मवेसी मन ल अजोला चारा उपलब्ध कराए बर घलोक 5 टैंक बनाये गये हे। श्री शर्मा ह स्व सहायता समूह के महिला मन अऊ चरवाहा मन ले चर्चा करिन। चरवाहा मन ल उमन पूछिन के गोबर के पइसा मिलीस हे या नइ। श्री शर्मा जी ह गांव वाले मन जउन गोबर लावत हें ते ल सुरक्षित तरीका ले रखे के उपाय मन उपर उमन जोर दीन। वनांचल के ये गौठान मन म लघु वनोपज लाख, हर्रा, बहेरा अऊ बीज प्रोसेसिंग के संभावना मन उपर घलोक वन मंडलाधिकारी ले चर्चा करिन। उमन कहिन के बायो डायर्सिटी बर गौठान मन म प्रयास करे जा सकत हे।
श्री शर्मा ह ग्राम कंचनपुर के गौठान म गोबर ले वर्मी खाद निर्माण ल देखिन अऊ ओखर गुणवत्ता ल परखिन। इहां 15 वर्मी टैंक अऊ 5 नाडेप टैंक म अभी तक 55 क्विंटल खाद तियार हे। गौठान म तीन महिला स्व-सहायता समूह सक्रिय हे जऊन खाद बनाए के संगें-संग गौठान के बाड़ी म सब्जी उत्पादन करत हें। श्री शर्मा ह गौठान म बनाये गए चारागाह अऊ बाड़ी के अवलोकन करिन अऊ महिला स्व-सहायता समूह मन ले चर्चा करिन अऊ उंखर समस्या मन के जानकारी लीन। महिला मन ले उमन कहिन के ओ मन अपन घर म घलोक बाड़ी लगावयं। सब्जी उत्पादन बर गौठान के वर्मी खाद के ही उपयोग करव ताकि गांव वाले मन ल घलोक अइसन करे के प्रेरणा मिलही। चरवाहा मन ले बातचीत के समय पता चलिस के हरेक चरवाहा ल गौठान ले रोजेच करीबन 30 किलो गोबर मिल जाथे। इहां एक चरवाहा के औसत मासिक आय 18 हजार रूपिया होवत हे। श्री शर्मा ह चरवाहा मन ले कहिन के गाय मन के मन लगाके सेवा करव काबर के इन्हीं ले उमन ल आजीविका मिलत हे।
दउरा के बेरा जिला पंचायत के मुख्य कार्यपालन अधिकारी श्री गजेन्द्र सिंह ठाकुर, डीएफओ श्री कुमार निशांत, जिला पंचायत के एपीओ श्री रिमन सिंह संग जनपद सीईओ, उद्यानिकी, कृषि, पशुपालन विभाग के अधिकारी घलोक संग रहिन।
