रायपुर, प्रदेशव्यापी भेंट-मुलाकात कार्यक्रम म मुख्यमंत्री श्री भूपेश बघेल के एक अलगेच रूप आगू आवत हे। लइका मन ले मिलना-जुलना अऊ उंखर से घुल-मिलके बात करना ह न सिरिफ लइका मन ल बने लागत हे भलुक मनखे मन ल घलोक ये अड़बड़ पसंद आवत हे। लइका मन घलोक मुख्यमंत्री के मया दुलार अऊ लगाव के चलते ओमां अपन सियान के रूप देखत हें।
मुख्यमंत्री के लइका मन ले लगाव के एक अऊ बात आगू आइस जब उमन हाईस्कूल अऊ हायर सेकेण्डरी के बोर्ड परीक्षा मन म प्रदेश के टॉप टेन लइका मन के संग जिला म पहिली स्थान म अवइया लइका मन ल हैलीकॉप्टर म घुमाए के वायदा करिन। करीबन 16 विधानसभा क्षेत्र के दौरा म मुख्यमंत्री ह लइका मन ले अनोखा अंदाज म मुलाकात करिन। कभू रस्सी कूदके त कभू निशाना साधके अऊ कभू गिल्ली-डंडा अऊ भौंरा खेलके लइका मन म रम गें।
भेंट-मुलाकात कार्यक्रम म लइका मन के मासूमियत भरे बात ले न सिरिफ उमन मुख्यमंत्री के दिल जीतत हें उहें मुख्यमंत्री घलोक लइका मन के पूछे गये सवाल मन के रोचक अंदाज म जवाब घलोक देवत हें। ओ मन बालहठ के आगू कई पइत झुकत घलोक नजर आवत हें। आप मन तो जानतेच हव के उंखर से जब लइका मन ह हैलीकॉप्टर म घूमे के जिद करिन तब लइका मन ल उमन मना नइ कर सकिन अऊ लइका मन ल हैलीकॉप्टर म सैर कराइन।
लइका मन ह घलोक ओ मन ल अपन बनाए स्कैच अऊ पेंटिंग भेंट करत हें। कोंडागांव जिला के बड़े डोंगर म आयुष जायसवाल ह पेंसिल ले मुख्यमंत्री के स्केच बनाइस अऊ उनला ल भेंट करिस। 12वीं के छात्र आयुष ह मुख्यमंत्री ले कहिस कि स्वामी आत्मानंद अंगरेजी माध्यम स्कूल के संग हजारों छ़ात्र के आप जीवन संवारत हव, ते पाए के आप मन हम सब लइका मन के असली सियान आव। जगदलपुर के भैंसगांव म तो स्कूली छात्रा मन ह मुख्यमंत्री अऊ उंखर माताश्री के पेंटिंग भेंट करिन जेखर से मुख्यमंत्री घलोक भावुक हो गए रहिन।
मुख्यमंत्री जिहां गीन उहां छात्र अपन प्रिय मुख्यमंत्री ले मिले बर पहिली ले ही मौजूद रहिन। फेर चाहे बात स्वामी आत्मानंद अंगरेजी माध्यम स्कूल के होवय, प्राइमरी के लइका मन के होवय या फेर कालेज म पढ़इया छात्र मन के होवय, हरेक लइका ओ मन ल अपन अभिभावक माने लगे हें। बस्तर के बादल एकेडमी के छात्र होए, इंदिरा कला संगीत विश्वविद्यालय खैरागढ़ के छात्र होए या फेर कोनो आन स्कूल के छात्र होए मुख्यमंत्री उंखर से मिलथें जरूर। मुख्यमंत्री के पारखी नजर अइसन हे कि भीड़ म रोत नोनी ल घलोक देख लेथें अऊ ओला चुप कराके ओखर समस्या के समाधान अऊ ओखर पढ़ाई के व्यवस्था घलोक कर देथें।
अइसन नइ हे कि मुख्यमंत्री सिरिफ घोषणा करत चले जात हें, भलुक घोषणा मन म फौरीतौर म अमल घलोक होवत हे। भेंट मुलाकात कार्यक्रम म मुख्यमंत्री आमजन ले मिले निकले हें, फेर ए कार्यक्रम म ओ मन ल लइका मन के प्यार मिलत हे अऊ लइका मन आत्मविश्वास के संग मुख्यमंत्री के आगू अपन बात रखत हें, येला देखके इही लगत हे कि नवा छत्तीसगढ़ गढ़े के दिशा म होवत पहल रंग लावत हे।
मुख्यमंत्री बनिन लइका मन के मयारू सियान
