- मुख्यमंत्री श्री भूपेश बघेल के निर्देशन म राजधानी रायपुर संग सबो जिला मन म मजदूर मन बर करे गीस विशेष इंतजाम
- मजदूर मन मानिन मुख्यमंत्री के आभार
रायपुर, 15 मई 2020। मुख्यमंत्री श्री भूपेश बघेल के निर्देश म छत्तीसगढ़ ले होके आन राज्य जवइया मजदूर मन ल पूरा मदद अऊ सहायता देहे जात हे। आन राज्य के मजदूर मन बर जिला प्रशासन ह खाए-पीए, नाश्ता, सेनेजाइजर, मास्क आदि के व्यवस्था करत हे। एखर ले अकतहा ए मजदूर मन ल ऊंखर राज्य के सीमा तक छोड़े बर वाहन के इंतजाम घलोक करे जात हे। मजदूर मन ल ए व्यवस्था ले अपन राज्य तक पहुंचे म बड़का मदद मिले हे जेखर बर ओ मन प्रदेश के मुख्यमंत्री श्री भूपेश बघेल के आभार घलोक जतावत हें।
नगर निगम अऊ स्मार्ट सिटी रायपुर अऊ स्वंय सेवी संस्था मन राजधानी रायपुर के कई जगा म अइसन मजदूर मन बर भोजन, नाश्ता अऊ पेयजल के इंतजाम करे हें। भोजन अऊ स्वल्पाहार वितरण बर अलग से वितरण काउंटर घलोक बनाय गए हे। छत्तीसगढ़ पहुंचइया आन राज्य के मजदूर मन के थर्मल स्क्रीनिंग के व्यवस्था घलोक करे गए हे। ए मन ल स्व-सहायता समूह मन कोति ले तियार करे गए मास्क के वितरण करे जात हे। ए मजदूर मन ल कोरोना संक्रमण ले बचाव बर मार्गदर्शन घलोक देहे जात हे। जिला प्रशासन ह पुलिस प्रशासन अऊ परिवहन विभाग के सहायोग ले ए मजदूर मन ल ऊंखर राज्य के सीमा तक छोड़े के घलोक व्यवस्था करत हे।
