गरम पौष्टिक अहार अऊ समुचित देखभाल ले 67 हजार ले जादा लइका मन होइन कुपोषण ले मुक्त
छत्तीसगढ़ म संघरा उदीम ले मिलीस सफलता
रायपुर,23 सितंबर 2020। मुख्यमंत्री श्री भूपेश बघेल के कुपोषण मुक्ति के पहल म छत्तीसगढ़ म 2 अकटूबर 2019 ले शुरू होए प्रदेशव्यापी मुख्यमंत्री सुपोषण अभियान के सकारात्मक परिणाम आगू आये हे। ए अभियान के संग कई ठन योजना मन के एकीकृत प्लान अऊ संघरा उदीम ले लइका मन म कुपोषण दूर करे म बड़का सफलता मिले हे। साल 2019 म करे गए वजन त्यौहार ले मिले आंकड़ा के मुताबिक प्रदेश म 9 लाख 70 हजार लइका कुपोषित रहिन, एमां ले मार्च 2020 तक 67 हजार 889 लइका कुपोषण ले मुक्त हो गे हें। ए मुताबिक कुपोषित लइका मन के संख्या म लगभग 13.79 प्रतिशत के कमी आए हे। जऊन कुपोषण के खिलाफ शुरू करे गए लड़ई म एक बड़का उपलब्धि हे। बहुतेच कम समय म प्रदेश म कुपोषण के दर म उल्लेखनीय कमी आए हे, एकर श्रेय मुख्यमंत्री भूपेश बघेल के कुशल नेतृत्व अऊ उंखर दूरदर्शी सोच ल जाथे।
छत्तीसगढ़ म नवा सरकार के गठन के बाद मुख्यमंत्री श्री बघेल ह राष्ट्रीय परिवार स्वास्थ्य सर्वेक्षण-4 के आंकड़ा म महिला अऊ लइका मन म कुपोषण अऊ एनीमिया के दर ल देखत प्रदेश ल कुपोषण अऊ एनीमिया ले मुक्त करे बर अभियान के शुरूआत करिन। राष्ट्रीय परिवार सर्वेक्षण-4 के मुताबिक प्रदेश के 5 साल ले कम उम्र के 37.7 प्रतिशत लइका कुपोषण अऊ 15 ले 49 साल के 47 प्रतिशत महिला मन एनीमिया ले पीड़ित रहिन। ए आंकड़ा ल देखन त प्रदेश म 9 लाख 70 हजार लइका कुपोषित रहिन। एमां ले अधिकांश आदिवासी अऊ दूरस्थ वनांचल इलाका मन के लइका रहिन। ए आंकड़ा ल राज्य सरकार ह एक चुनौती के रूप म लिस अऊ ‘कुपोषण मुक्त छत्तीसगढ‘ के संकल्पना के संग महात्मा गांधी के 150वां जयंती ले पूरा प्रदेश म मुख्यमंत्री सुपोषण अभियान के शुरूआत करिस। अभियान ल सफल बनाए बर ये मां जन-समुदाय के घलोक सहयोग ले गीस ।
प्रदेश के नक्सल प्रभावित बस्तर संग वनांचल के कुछ ग्राम पंचायत मन म पायलट प्रोजेक्ट के रूप म सुपोषण अभियान के शुरूआत करे गीस। दंतेवाड़ा जिला म पंचायत मन के माध्यम ले गरम पौष्टिक भोजन अऊ धमतरी जिला म लइका जतन ठउर जइसे नवाचार कार्यक्रम के संग एला आगू बढ़ाए गीस। जिला खनिज न्यास निधि के एक बेहतर उपयोग करके सुपोषण अभियान के तहत गरम भोजन प्रदान करे के व्यवस्था करे गीस। योजना के सफलता ल देखत मुख्यमंत्री श्री बघेल ह एला पूरा प्रदेश म लागू करिस। ए अभियान के तहत चिन्हांकित लइका मन ल आंगनवाड़ी केन्द्र म देहे जात पूरक पोषण आहार के अकतहा स्थानीय स्तर म निःशुल्क पौष्टिक आहार अऊ कुपोषित महिला अऊ लइका मन ल गरम पौष्टिक भोजन के व्यवस्था करे गए हे। स्वास्थ विभाग के सहयोग ले एनीमिया प्रभावित मन ल आयरन पोलिक एसिड, कृमिनाशक गोली दे गीस। प्रदेश ल अवइया 3 बछर म कुपोषण ले मुक्त करे के लक्ष्य के संग महिला अउ बाल विकास विभाग, स्वास्थ्य विभाग संग आन विभाग मन ले संघरा उदीम सरलग करे जात हे।
कोरोना वायरस (कोविड-19) के संक्रमण के रोकथाम अऊ नियंत्रण बर सबो आंगनबाड़ी अऊ मिनी आंगनबाड़ी केन्द्र मन के बंद होए म घलोक लइका मन अऊ महिला मन के पोषण स्तर ल बनाए रखे बर मुख्यमंत्री ह आंगनबाड़ी कार्यकर्ता मन के माध्यम से प्रदेश के 51 हजार 455 आंगनबाड़ी केन्द्र मन के लगभग 28 लाख 78 हजार हितग्राही मन ल घर-घर जाके रेडी-टू-ईट पोषक आहार के वितरण सुनिश्चित कराए हे। पूरक पोषण आहार कार्यक्रम के तहत 6 महिना ले 6 साल तक के लइका मन, गर्भवती, शिशुवती महिला अऊ किशोरी बालिका मन ल रेडी-टू-ईट के वितरण करे जात हे। कुपोषण म मिलत सफलता ल बनाय रखे अऊ कोरोना के असर लइका मन के स्वास्थ्य म झन होवय एला देखत प्रदेश म संक्रमण मुक्त स्थान मन म जनप्रतिनिधि अऊ पालक मन के सहमति ले आंगनबाड़ी ल खोले गीसI जिहां सुरक्षा के प्रबंध के संग फेर मुख्यमंत्री सुपोषण अभियान के अंतर्गत हितग्राही मन ल गरम भोजन देहे के व्यवस्था करे गए हे। विश्व बैंक ह घलोक प्रदेश म आंगनाबाड़ी कार्यकर्ता मन से कोरोना वायरस के नियंत्रण के संग ही टेक होम राशन वितरण काम के प्रशंसा करे हे।
