रायपुर GG Digital News Desk, घुमई-फिरई के सउंख करइया मन बर छत्तीसगढ़ सरकार बड़का तोहफा लाए हे। अब आप अपन प्रदेश के तीरथ-बरत अउ पर्यटन स्थल के सैर बहुत कम खर्चा म कर सकहू। छत्तीसगढ़ पर्यटन विभाग अउ आईआरसीटीसी (IRCTC) मिलके ‘मुख्यमंत्री जन पर्यटन प्रोत्साहन योजना Chief Minister’s Public Tourism Promotion Scheme’ शुरू करत हे, जेमा पर्यटक मन ल 75% तक के भारी भरकम छूट (सब्सिडी) मिलही।
का हे ये योजना?
मुख्यमंत्री विष्णुदेव साय के कहना हे के ये योजना ले हमर छत्तीसगढ़ के खूबसूरती देश-दुनिया तक पहुंचही। एमा रायपुर ले 4 ठन खास टूर पैकेज बनाए गे हे। सबले बढ़िया बात ये हे के 18 साल ले ज्यादा उमर के लोगन मन ल 75% अउ 2 ले 18 साल के लइका मन ल 85% के छूट मिलही।
ये 4 पैकेज हे कहां-कहां के?
1. रायपुर सिटी टूर: एमा आप राम मंदिर, पुरखौती मुक्तांगन, ट्राइबल म्यूजियम, नंदनवन अउ कौशल्या माता मंदिर घूम सकहू।
2. धार्मिक टूर: एमा बंजारी माता, महामाया मंदिर, इस्कॉन मंदिर, दंतेश्वरी मंदिर अउ हनुमान मंदिर के दर्शन करहू।
3. बस्तर टूर (3 दिन): एमा चित्रकोट, तीरथगढ़, कुटुमसर गुफा अउ दंतेवाड़ा के सैर सामिल हे।
4. सिरपुर-बारनवापारा (2 दिन): एमा सिरपुर के ऐतिहासिक मंदिर अउ बारनवापारा जंगल सफारी के मजा ले सकहू।
सुविधा का-का मिलही?
आप ल चिंता करे के कोनो जरूरत नई हे। टूर म एसी (AC) गाड़ी, गाइड, नास्ता-खाना अउ इंश्योरेंस के सुबिधा सरकार डहर ले रइही। बस ध्यान रखव के ये पैकेज बर कम से कम 10 झन के ग्रुप होना जरूरी हे। सबो यात्रा रायपुर रेलवे स्टेशन ले शुरू होही।
पर्यटन मंत्री राजेश अग्रवाल कहिन के एखर से न सिरिफ हमर संस्कृति के प्रचार होही, बल्कि स्थानीय लोगन ल रोजगार घलो मिलही। त फेर देरी झन करव, अपन परिवार संग घूमे के प्लान बनाव!