बिलासपुर म 9 महिना म 131 मरीज मन ल मिलीस लाभ
बिलासपुर, 22 सितमबर 2024। बिलासपुर के हेमूनगर निवासी लालवानी परिवार के मुखिया खियाल दास लालवानी ल किडनी ले जुड़े गंभीर बीमारी के इलाज बर ‘मुख्यमंत्री विशेष स्वास्थ्य सहायता योजना’ के तहत सहायता राशि पास हो गे, जेखर से अब ओखर इलाज चलत हे, अऊ परिवार ह राहत के सांस लेहे हे। लालवानी परिवार ह मुख्यमंत्री श्री विष्णु देव साय के संवेदनशील पहल बर आभार जताए हे।
लालवानी परिवार म ओ समे दुख के पहाड़ टूट परिस जब ऊंखर घर के एक मात्र कमइया किडनी के गंभीर बीमारी के चपेट म आ गे। बुधवारी बाजार म अपन छोट कन व्यवसाय ले परिवार चलइया मुखिया के गंभीर बीमारी ह पूरा परिवार के खुसी छीन लीस। खियाल दास लालवानी के पत्नी श्रीमती लक्ष्मी लालवानी ह भावुक होवत बताइस के पाछू 6 साल म महंगा इलाज के खरचा म उंखर जमा पूंजी खतम हो गे, दू बेटि के पढ़ाई प्रभावित होए लगीस। ए हालत म बेटि मन के उच्चशिक्षा के खर्च उठाना मुश्किल हो गे अऊ मोला व्यवसाय संभालना परिस, जबकि में हमेशा ले एक गृहिणी रहेंव।
श्रीमती लालवानी ह बताइस के बेटि मन ह अपन पढ़ाई के संग घर म ट्यूशन पढ़ाके परिवार के जरूरी खर्च पूरा करिन, फेर डायलिसिस के महंगा खर्च वहन करना ऊंखर बर अड़बड़ मुश्किल रहिस। अइसन म ओ मन ल ए योजना के विसय म जानकारी मिलीस, अऊ आवेदन करे के बाद जल्दी सहायता राशि स्वीकृत हो गे। अब आसानी ले वोखर पति के इलाज हो पात हे। श्रीमती लालवानी हिस के मुख्यमंत्री के ए संवेदनशील योजना ले वोखर पति ल नवा जिंदगी मिले हे, वो ह मुख्यमंत्री श्री विष्णु देव साय के आभार जतात कहिस के अचानक आए ए मुसीबत ले उबरे म ए सहायता राशि ले उनखर जइसे कई परिवार ल बड़ मदद मिले हे।
जानबा हे कि मुख्यमंत्री विशेष स्वास्थ्य सहायता योजना के तहत गंभीर रोग के इलाज बर 25 लाख रूपिया तक के आर्थिक सहायता देहे जाथे। जिला म अब तक 636 मनखे मन ह योजना के तहत लाभ प्राप्त करे हे, अऊ ए साल जिला के 131 मरीज मन ल योजना के तहत लाभान्वित करे गए हे।