मुख्यमंत्री श्री भूपेश बघेल के दस दिन के अमेरिका प्रवास कई मायने म सार्थक रहिस। अमेरिका म भारतीय औद्योगिक निवेशक मन ले चर्चा छत्तीसगढ़ बर नवा संभावना के दुवार खोलही। अर्थशास्त्र म नोबल पुरस्कार पाए प्रो. अभिजीत बनर्जी राज्य के अथे व्यवस्था ल मजबूत बनाए के संगेच मानव सूचकांक उपर बेहतर प्रदर्शन बर योजना बनाए म सहायता देंहीं। ये गढबो नवा छत्तीसगढ़ बर सार्थक होही।
मुख्यमंत्री ह कहिन कि राज्य के 30 ले 40 प्रतिशत क्षेत्र बहुत पिछड़ा हे। जिहां 50 ले 60 प्रतिशत गरीबी हे। ये क्षेत्र वन ले आच्छादित होए के सेती इहां सड़क, शिक्षा अऊ विद्युत पहुंचाए म दिक्कत होथे। पर्यावरण क्लीयरेंस के सेती इहां सिंचाई परियोजना मन ल बनाए म समस्या आथे। अइसन परिस्थिति मन म अर्थशास्त्री अभिजीत बनर्जी के सामाजिक आर्थिक गतिविध मन बर देहे गए मार्गदर्शन अऊ सुझाव इहां के कुपोषण अऊ गरीबी उन्मूलन के संगेच समावेशी विकास के दिशा म कारगर होही अऊ इहां बर एक बड़का उपलब्धि होही।
छत्तीसगढ़ के टीम ह ये दौरा म राज्य म औद्योगिक निवेश के संभावना मन के बारे म उहां के बहुत अकन औद्योगिक प्रतिनिधि मन ले रूबरू चर्चा करिन। ये टीम ह उंखर जिज्ञासा अऊ सवाल मन के न केवल समाधान करिस भलुक ओ मन ल राज्य म औद्योगिक निवेश बर उत्सुक बनाए म कोनो कसर नइ छोडि़स। बोस्टन, सेनफ्रांसिस्को अऊ न्यूयार्क म कई औद्योगिक निवेशक मन ह उद्योग लगाय म रूचि घलोक दिखाईन।
छत्तीसगढ़ देश म अकेला अइसन प्रदेश हे जिहां औद्योगिक निवेश बर सबो जरूरी संसाधन उपलब्ध हे। इहां लोहा, कोयला, बिजली अऊ सस्ता मानव संसाधन उपलब्ध हे। जल संसाधन के बात करव तो इहां हिमालय के तराई के बाद सबले उन्नत जल प्रवाह तंत्र हे। इहां 80 प्रतिशत आबादी कृषि उपर निर्भर हे। इहां धान के विपुल उत्पादन होथे।
राज्य सरकार ह अपन नवा औद्योगिक नीति म कृषि अऊ वन आधारित उद्योग मन के संगेच कोर सेक्टर अऊ आधुनिक उद्योग मन ल प्राथमिकता म सामिल करे हे। पिछड़े क्षेत्र मन म उद्योग लगाय बर कई प्रकार के रियायत के प्रावधान घलोक रखे गए हे। ए प्रावधान मन के लाभ निवेशक उठा सकत हें। इहां निवेश करे म ओ मन ल प्राकृतिक संसाधन के संगेच सस्ता श्रम घलोक मिलही।
मुख्यमंत्री ह एम.आई.टी म सामाजिक आर्थिक सूचकांक म उहां के प्रोफेसर मन ले चर्चा म छत्तीसगढ़ के परिस्थिति मन के जानकारी दीन अऊ ओ मन ल इहां ए क्षेत्र मन म सर्वे करके डाटा तियार करे के बारे म घलोक चर्चा करिन जेखर से राज्य के विकास के दिशा निरधारित करे जा सकय। हार्वड विश्व विद्यालय म उमन राज्य के महत्वाकांक्षी परियोजना सुराजी गांव योजना के विस्तार ले जानकारी दीन। उहां के प्रोफेसर मन ह छत्तीसगढ़ आके ये योजना म शोध बर एक टीम भेजे उपर सहमति दीन।
श्री बघेल अमेरिकी प्रोफेसर अऊ विद्वान मन के बीच विश्व के सर्वश्रेष्ठ विश्वविद्यालय म ले एक हार्वर्ड मे व्याख्यान देवइया छत्तीसगढ के पहिली मुख्यमंत्री यें। उमन अपन दौरा म संयुक्त राष्ट्रसंघ के कार्यप्राणाली के घलोक जानकारी लीन अऊ उहां अधिकारी मन ह कई ठन देश मन के मुद्दा ल कइसे रखे जाथे अऊ ए मुद्दा मन म विचार विमर्श के प्रक्रिया के बारे म बताइन। न्यूयॉर्क म कांसुलेट जनरल ऑफ इंडिया म यूएस इण्डिया स्ट्रेटिजिक पार्टनरशिप फोरम के संग एक बिजनेस मीटिंग म मुख्यमंत्री ह कहिन कि छत्तीसगढ़ म आईटी, इलेक्ट्रानिक्स, बायो फ्यूल, टेक्सटाईल, फार्मा, आयुर्वेद अऊ सर्विस इंडस्ट्री म निवेश के बेहतर संभावना मौजूद हे।
छत्तीसगढ़ म विपुल खनिज वन, अऊ जल संपदा के बेहतर उपयोग अऊ सही निवेश के साथ राज्य के आर्थिक कार्य कलाप मन ल गति दे सकत हे। समावेश विकास अऊ राज्य के जइसे आर्थिक माडल के साथ इहां के मनखे मन के जीवन स्तर उंचा करके ही छत्तीसगढ़ के पुरखा मन के सपना ल आकार दे सकत हे।
