चीफ सिकरेट्री अमिताभ जैन ह कलेक्टर मन ल दीन हुकुम, एको कोरोना मरीज के मिलतेच इलाका ल बनाव कंटेनमेंट जोन

रायपुर, आज चीफ सिकरेट्री अमिताभ जैन ह सबो कलेक्टर मन के वीडियो कांफ्रेंसिंग लीन अऊ नवा वैरिएंट ओमिक्रान के मद्देनजर सबो कलेक्टर मन ल निर्देश दीन। सबो कलेक्टर मन ल हुकुम देहे गए हे कि जेन गांव म एको पॉजेटिव मरीज हे, ओला कटेनमेंट जोन बनाए जाए, वइसनहे शहरी इलाका मन म घलोक कहूं कोनो जगा एको संक्रमित मिलय, त ओला कंटेनमेंट जोन बनाए जाए। पॉजेटिव मरीज के कांटेक्स ट्रेसिंग म सख्ती के निर्देश देहे गए हे। पॉजेटिव मरीज के संपर्क म आये मनखे मन ल रिपोट आए तक क्वारंटीन रखे के घलोक निर्देश कलेक्टर मन ल चीफ सिकरेट्री ह देहे हें।
मरीज मन ल हर हाल म 14 दिन बर होम आइसोलेशन म रहना होही। उहें विदेश यात्रा ले आये मनखे मन ल घलोक होम क्वारंटीन म तब तक रखे जाए, जब तक उंखर रिपोट ना आ जाये। कलेक्टर मन ल ये बात के घलोक निर्देश देहे गए हे के रेल, हवाई अऊ सड़क मार्ग ले दूसर राज्य ले अवइया मनखे मन के सीमावर्ती सड़क मन न ही कोरोना जांच के व्यवस्था करे जाये। विदेश ले आये मनखे मन के जांच सैंपल जीनोम सिक्वेसिंग बर भेजना जरूरी कर दे गए हे।