रायपुर, 13 अगस्त 2020। मुख्य सचिव श्री आर.पी. मंडल ह मुख्यमंत्री श्री भूपेश बघेल के हुकुम मन के मुताबिक राज्य के जिला मन के प्रभारी सचिव मन ल एक महिना के भीतर गिरदावरी के काम पूरा कराए के हुकुम देहे हें जेमा एको गलती झन रहे। मुख्य सचिव श्री मंडल ह सबो प्रभारी सचिव मन ल भेजे गे अपन अर्द्धशासकीय पत्र म कहे हें के ए अभियान म राज्य स्तर ले जिला तक प्रभारी सचिव कोति ले मॉनीटरिंग अऊ मैदानी स्तर म निरीक्षण बहुत महत्वपूर्ण हे। उमन जिला के प्रभारी सचिव मन ल अवैया एक महिना के भीतर अपन प्रभार के जिला के सघन दौरा करके एखर समीक्षा करे अऊ निरधारित प्रारूप म निरीक्षण प्रतिवेदन उपलब्ध कराए ल कहे हें।
मुख्य सचिव ह कहे हें के समर्थन मूल्य म धान अऊ मक्का खरीदी अऊ राजीव गांधी किसान न्याय योजना के तहत रकबा के आधार म किसान मन ल लाभ देहे जात हे। एखर बर सही किसान, ऊंखर सही रकबा अऊ ओमा लगे फसल के सत्यापन होना बहुत जरूरी हे। राज्य के कई ठन जिला मन म अइसन कई क्षेत्र हे जिहां धान के अकतहा आन फसल मन के वृहद् क्षेत्र म उत्पादन करे जात हे। जेखर सेती अभियान के रूप म त्रुटिरहित गिरदावरी करे जाना शासन के सर्वोच्च प्राथमिकता हे।
मुख्य सचिव ह चिट्ठी म कहे हें के प्रदेश म खरीफ विपणन साल 2020-21 म किसान मन ले समर्थन मूल्य म धान अऊ मक्का खरीदी बर तैयारी चालू हो गे हे अऊ एखर बर 17 अगस्त 2020 ले किसान पंजीयन के काम चालू होही। प्रदेश म राजीव गांधी किसान न्याय योजना के तहत खरीफ मौसम बर धान, मक्का, सोयाबीन, मूंगफली, तिल, अरहर, मुंग, उड़द, कुलथी, रामतिल, कोदो, कुटकी अउर रागी अउर रबी म गन्ना फसल ल सामिल करे गए हे। ए योजना मन के प्रभावी क्रियान्वयन बर त्रुटिरहित गिरदावरी के काम बहुत जरूरी हे।
