रायपुर, मुख्य सचिव श्री आर.पी. मण्डल ह मंत्रालय महानदी भवन ले वीडियो कॉन्फ्रेंसिंग के माध्यम ले राज्य के कलेक्टर, जिला पंचायत के मुख्य कार्यपालन अधिकारी, जिला विपणन अधिकारी, नगरीय निकाय के मुख्य कार्यपालन अधिकारी मन अऊ खाद्य अधिकारी मन के बैठक लीन। जेमां नगरीय निकाय मन के नवनिर्वाचित जनप्रतिनिधि मन के शपथ, पहिली सम्मेलन, मेयर के चयन, धान खरीदी अऊ कस्टम मिलिंग, माननीय राष्ट्रीय हरित अधिकरण के निर्देश के पालन, बस्तर संभाग म मलेरिया उन्मूलन अभियान संग आन बिन्दु उपर विस्तार ले चर्चा करे गीस अऊ प्रगति के समीक्षा करे गीस। मुख्य सचिव ह विशेष रूप ले कलेक्टर अऊ नगरीय निकाय मन के मुख्य कार्यपालन अधिकारी मन ले कहिन के शीतलहर अऊ ठंड ले बचाव बर रात के समय आमजन ल राहत देवाए बर अलाव जलाना चालू करव। शहर मन म चलत रैन बसेरा अऊ नाईट सेल्टर म कम्बल संग आन गरम कपड़ा के व्यवस्था ठउका करे जाय। सामुदायिक भवन मन ल घलोक रात के समय सुरक्षित तरीका ले यात्री मन बर उपयोग करे जाए। रेल्वे स्टेशन, बस स्टेंड जइसे सार्वजनिक स्थान जिहां रात म घलोक लोगन के आना जाना लगे रहिथे उहां घलोक अलाव के व्यवस्था करे के निर्देश मुख्य सचिव ह दिए हें। श्री मण्डल ह सबो शहरी क्षेत्र मन म सफाई व्यवस्था नियमित रूप ले जारी रखे अऊ लोक सेवा गारंटी अधिनियम के क्रियान्वयन गंभीरता पूर्वक करे के निर्देश घलोक दीन हे। राष्ट्रीय राजमार्ग अऊ राज्य के सड़क मन के किनारे के गांव मन अऊ वन क्षेत्र मन म गौठान मन के निर्माण काम म तेजी लाय के निर्देश घलोक देहे हें।
पंचायत अउ ग्रामीण विकास विभाग के काम मन के समीक्षा करत श्री मण्डल ह कहिन कि धान कटाई के काम खतम हावइया हे। सबो गौठान मन ले लगे गांव मन म पैरा-दान के प्रक्रिया गौठान समिति अऊ जनभागीदारी ले शुरू कर दिए जाय। गौठान तीर ही दान म मिलत पैरा ल सकेले जाए अऊ वोला मवेसी अउ आन दुर्घटना मन ले बचाके रखे जाय। अवइया 20 दिन के भीतर राज्य के सबो गौठान मन म जादा ले जादा मात्रा म पैरावट के संग्रहण ठउका करे जाए। जेखर उपयोग गौठान के मवेसी मन के चारा के रूप म करे जा सकय। गौठान मन ल बहुउद्देशीय आर्थिक गतिविधि मन बर केन्द्र के रूप म विकसित करे जाए। जिहां स्थानीय स्वसहायता समूह मन के माध्यम ले कई ठन आर्थिक गतिविधि मन के संचालन करे जाही। श्री मण्डल ह सबो गौठान मन म महिला अउ पुरूष मन बर शौचालय के निर्माण करे के निर्देश दिए हें।
नवनिर्वाचित जनप्रतिनिधि मन के शपथ-प्रथम सम्मेलन के विसय म जानकारी देवत श्री मण्डल ह बताइन कि निरधारित समयावधि म नवनिर्वाचित पार्षद मन के शपथग्रहण कराया जाना हे। शपथग्रहण के संगेच उंखर कार्यकाल चालू माने जाही। शपथग्रहण करे के बाद ही पार्षद मेयर के चयन प्रक्रिया बर पात्र होहीं। ए संबंध म नगरीय निकाय निर्वाचन के तरफ ले विस्तृत दिशा-निर्देश देहे गए हे। ओखर अनुसार ही काम करे जाना हे। श्री मण्डल ह बताइस कि बस्तर संभाग ल मलेरिया मुक्त बनाए बर 15 जनवरी ले 14 फरवरी 2020 तक एक महिना सघन अभियान चलाए जाही। एखर तहत बीजापुर, दंतेवाड़ा, नारायणपुर, सुकमा, कांकेर, कोण्डागांव, बस्तर के हर घर, आश्रम छात्रावास, पैरामीलेट्री कैम्प आदि म स्वास्थ्य विभाग के टीम सर्वे करही, हर एक सदस्य के रक्त के जांच करे जाही अऊ मलेरिया पाए जाय म तुरंत ओखर ईलाज शुरू करे जाही। मच्छर मन के पनपे के जगा मन के नियमित साफ-सफाई करे जाही अऊ दवाई के छिड़काव करे जाही। ये काम बर 1720 दल के गठन करे जाही। उमन मलेरिया के कारण होवइया मृत्यु ल गंभीरता ले लेहे अऊ ये अभियान ल जन अभियान के रूप म विस्तारित करे के निर्देश दिए हें। उमन प्रभावित क्षेत्र मन संग राज्य भर के सबो नागरिक मन ले अपील करे हें कि मच्छर ले फैलइया संक्रामक बीमारी मन ले बचे बर मच्छरदानी के उपयोग जरूर करव अऊ अपन आस-पास सफाई रखव।
माननीय राष्ट्रीय हरित अधिकरण कोति ले देहे गे निर्देश मन के क्रियान्वयन अऊ ओखर पालन प्रतिवेदन गंभीरता पूर्वक विभाग म प्रस्तुत करे के निर्देश श्री मण्डल ह दीन हे। नदिया मन के किनारे के अतिक्रमण हटाए अऊ उहां पौध रोपण करे के निर्देश घलोक उमन दीन हे। खरीफ साल 2019-20 म धान खरीदी के समीक्षा करत उमन पूरा सजगता के संग प्रक्रिया के निगरानी के निर्देश दीन हें। उमन कहिन कि धान खरीदी केन्द्र मन म धान के बोरा के रख-रखाव, बारदाना मन के उपलब्धता, छोटे अऊ मध्यम किसान मन ले धान के खरीदी, बारिश ले धान के बचाव म विशेष ध्यान रखे जाय। अइसन किसान जिंकर पंजीकृत रकबा के पूरा धान के खरीदी हो गए हे। उंखर एंट्री कर लेहे जाय ताकि उंकर उपयोग अवैध धान के बिक्री बर झन करे जा सकय। धान के मिलिंग बर मिलर मन कोति ले बैंक गारेंटी जिला म जमा करे जाथे। कुछ जिला मन म बैंक गारेंटी जमा नइ होए के जानकारी मिले म श्री मण्डल ह नाराजगी व्यक्त करे हें। उमन कहिन के बैंक गारेंटी के बिना मिलिंग बर धान के उठाव करे जाना अपराध के श्रेणी म आथे। जेखर सेती सबो जिला कलेक्टर मिलर मन के बैठक बुलाके उंखर से मिलिंग बर बैंक गारंटी प्राप्त करव। ये बेरा म प्रमुख सचिव पंचायत अउ ग्रामीण विकास श्री सुब्रत साहू, सचिव नगरीय प्रशासन श्रीमती मंगई डी., सचिव खाद्य डॉ. कमलप्रीत सिंह, सचिव गृह अउ पर्यावरण सुश्री पी.संगीता, राष्ट्रीय स्वास्थ्य मिशन के प्रबंध संचालक डॉ. प्रियंका शुक्ला उपस्थित रहिन।
