मुख्यमंत्री श्री साय ह आदित्य ल जन्मदिन के शुभकामना दीन
योग अऊ पर्यावरण के क्षेत्र म सबले कम उमर के पीएचडी धारक के रूप म छत्तीसगढ़ के आदित्य राजे के नाम गोल्डन बुक ऑफ वर्ल्ड रिकॉर्ड म दर्ज
रायपुर, 24 सितंबर 2024, मुख्यमंत्री श्री विष्णु देव साय ले आज इहां ऊंखर निवास कार्यालय म बाल पर्यावरण मित्र अऊ लिटिल योगा चैम्पियन आदित्य राजे सिंह ह सौजन्य मुलाकात करिस। मुख्यमंत्री ह आदित्य ल आज वोखर जन्मदिन के अवसर म केक काटके बधाई दीन। मुख्यमंत्री ह योग अऊ पर्यावरण के क्षेत्र म सबले कम उमर के पीएचडी धारक के रूप म छत्तीसगढ़ के आदित्य राजे के नाम गोल्डन बुक ऑफ़ वर्ल्ड रिकॉर्ड्स म दर्ज होए म प्रमाण पत्र घलोक प्रदान करिन अऊ ए उपलब्धि के सराहना करिन। आदित्य ह ए खास मौका म मुख्यमंत्री ल पौधा भेंटकरके ओखर आशीर्वाद लीन।
मुख्यमंत्री ल आदित्य ह पर्यावरण, योग, खेल, समाजिक विकास जइसे क्षेत्र मन म होवत रचनात्मक काम मन ले अवगत कराइस। मुख्यमंत्री श्री साय ह आदित्य ल अतका कम उम्र म ए उपलब्धि बर शुभकामना देवत वोखर उज्ज्वल भविष्य के कामना करिन।
ए अवसर म आदित्य के पिता श्री अखिलेश सिंह ह मुख्यमंत्री ले चर्चा म बताइस के नई दिल्ली स्थित कांस्टीट्यूशन क्लब ऑफ़ इण्डिया म पर्यावरण अऊ योग के क्षेत्र म मैरीलैंड स्टेट युनिवर्सिटी, यूएसए ले पीएचडी के मानद उपाधि ले घलोक सम्मानित करे गए हे। वो ह बताइस के आदित्य सिरिफ 5 साल के उम्र ले पर्यावरण, योग अऊ जन-जागरूकता के क्षेत्र म काम करत हे। ओ ल राज्य अऊ राष्ट्रीय स्तर म कई ठन पुरस्कार ले घलोक नवाजे गए हे। आदित्य आयुष मंत्रालय ले प्रमाणित योग स्वयं सेवक घलोक हे। ओ अपन कोडिंग कौशल के माध्यम ले पर्यावरण संबंधित एप म घलोक काम करत हे।
मुलाक़ात के समय श्री संजय श्रीवास्तव, आदित्य के दादा श्री कमला पति सिंह, माँ श्रीमती नम्रता सिंह,बहिनी आस्था सिंह, गोल्डन बुक ऑफ़ वल्ड रिकॉर्ड के प्रतिनिधि श्रीमती सोनल शर्मा घलोक मौजूद रहीन।