सचिव श्रीमती आबिदी ह पुलिस, रेलवे, बीएसएनएल के अधिकारी मन के संघरा बैठक लीन
रायपुर, 30 मई 2024। लइका अउ महिला मन ल जल्दी सहायता उपलब्ध कराए के उद्देश्य ले 24 घंटा आपातकालीन सेवा के रूप म लइका मन बर चाईल्ड हेल्पलाईन सी.एच.एल-1098 अउ महिला मन बर महिला हेल्पलाईन डब्ल्यू.एच.एल-181 संचालित हे। ये हेल्पलाईन ल जादा प्रभावी बनाए बर पुलिस विभाग कोति ले संचालित ई.आर.एस.एस-112 के संग इंटीग्रेशन करे जात हे। हेल्पलाईन ल प्रभावी बनाए के उद्देश्य ले पाछू दिनन म मंत्रालय महानदी भवन म महिला अउ बाल विकास के सचिव श्रीमती शम्मी आबिदी ह सी-डैक तिरूअनंतपुरम, पुलिस विभाग के ई.आर.एस.एस-112 के टीम, बीएसएनएल, रेलवे अउ महिला अउ बाल विकास विभाग के अधिकारी मन के संघरा बैठक लीन। उमन अधिकारी मन ल हेल्पलाईन ल लइका मन अउ महिला मन के जल्दी मदद बर प्रभावी बनाए के निर्देश दीन। बैठक म संचालक महिला अउ बाल विकास श्रीमती तुलिका प्रजापति घलोक मौजूद रहिस।
सचिव श्रीमती शम्मी आबिदी ह पिछले बैठक म देहे गे निर्देश के परिपालन के विस्तृत समीक्षा करिन। बैठक म जानकारी देहे गीस कि अभी हाल म सबो 33 जिला मन म चाईल्ड हेल्पलाईन संचालन बर हार्डवेयर लगाए जा चुके हे। 32 जिला मन म चाईल्ड हेल्पलाईन के डब्ल्यू.सी.डी. कंट्रोल रूम ले इंटीग्रेशन करके संचालन चालू हो चुके हे। इंटीग्रेशन के कार्यवाही पूर्ण करे बर सी-डैक अउ बीएसएनएल के अधिकारी मन ल निर्देश देहे गये हे। राज्य के 27 जिला मन के वन स्टॉप सेंटर (सखी सेंटर) म महिला हेल्पलाईन यूनिट के स्थापना अउ इंटीग्रेशन करके संचालन करे जात हे। सचिव, महिला अउ बाल विकास ह रेलवे रायपुर अउ बिलासपुर ले आए अधिकारी अउ विभागीय अधिकारी मन ल निर्देशित करिन कि लइका मन के सर्वाेत्तम हित म रायपुर अउ बिलासपुर रेलवे स्टेशन के उपयुक्त स्थान म चाईल्ड हेल्पलाईन के संचालन करे जाए। ए संबंध म उमन संबंधित आधिकारी मन ल लउहे कार्यवाही ठउका करे अउ अधिकारी मन ल खुदे स्थल के निरीक्षण करके प्रतिवेदन प्रस्तुत करे के निर्देश दीन। सचिव, महिला अउ बाल विकास ह चाईल्ड हेल्पलाईन-1098 अउ डब्ल्यू.एच.एल-181 म आए प्रकरण मन के विस्तृत समीक्षा करिन अऊ लंबित प्रकरण मन के लउहे निराकरण बर संबंधित अधिकारी मन ल निर्देश दीन।
