आदिवासी क्षेत्र मन म विकास के नवा अंजोर बगराही, चिराग परियोजना: श्री भूपेश बघेल

जगदलपुर, मुख्यमंत्री श्री भूपेश बघेल ह आज जगदलपुर म चिराग परियोजना के शुभारंभ करिन। कुम्हरावंड स्थित शहीद गुण्डाधूर कृषि महाविद्यालय परिसर म आयोजित कृषि मड़ई कार्यक्रम म परियोजना के शुभारंभ करत मुख्यमंत्री श्री बघेल ह विश्व बैंक के सहायता ले संचालित होवइया करीबन 1735 करोड़ रुपिया के ये परियोजना ल बस्तर के मनखे मन के जीवन म बदलाव लवइया अब तक के सबले बड़े परियोजना बताइन। मुख्यमंत्री ह कहिन कि हर बड़े योजना के शुभारंभ बस्तर म मां दंतेश्वरी के आशीर्वाद लेके करे जात हे अऊ एकरे परिणाम हे कि ये योजना मन सफल घलोक होवत हें। उमन कहिन कि “चिराग परियोजना” छत्तीसगढ़ के बस्तर अऊ सरगुजा संभाग संग 14 जिला मन म लागू करे जाही। उमन कहिन कि चिराग परियोजना आदिवासी क्षेत्र मन म विकास के नवा अंजोर बगराही। मुख्यमंत्री ह ये बेरा म शासकीय महिला पॉलिटेक्निक धरमपुरा के नामकरण धरमू माहरा के नाम म अऊ बस्तर हाईस्कूल ल जगतू माहरा के नाम म करे के घोषणा करिन। एखर संगेच उमन जगतू माहरा के नाम म भव्य सामुदायिक भवन बनाए के घोषणा करिन।
मुख्यमंत्री ह कृषि मड़ई म बड़ संख्या म पहुंचे किसान मन ल संबोधित करत कहिन कि ये योजना के उद्देश्य किसान मन के आमदनी के अवसर मन ल बढ़ाना, गांव मन म पौष्टिक भोजन के उपलब्धता सुनिश्चित करना, क्षेत्र के जलवायु म आधारित पोषण-उत्पादन प्रणाली विकसित करना, प्राकृतिक संसाधन मन के बेहतर प्रबंधन के कार्यप्रणाली के विकास करना हे। ये परियोजना के माध्यम ले कृषि क्षेत्र म विकास के नवा अऊ विकसित तौर-तरीका मन ल बढ़ावा देहे जाही। “चिराग परियोजना” आदिवासी मन बर नवा अवसर अऊ नवा आशा लवइया परियोजना ये। आधुनिक खेती अऊ नवाचार ले जुड़के ओ मन नवा जीवन म प्रवेश करहीं।
ए परियोजना बर विश्व बैंक अऊ संयुक्त राष्ट्र संघ के कृषि विकास बर स्थापित संस्था आईएफएडी ह वित्तीय सहायता देहे हे। विश्व बैंक कोति ले 730 करोड़ रुपिया, आईएफएडी कोति ले 486.69 करोड़ रुपिया के सहायता ये परियोजना बर देहे गए हे। राज्य सरकार ह ये परियोजना के कुल राशि म 30 प्रतिशत राशि, 518.68 करोड़ रूपिया अपन राजकीय कोष ले उपलब्‍ध कराए हे। चिराग परियोजना ल बस्तर, बीजापुर, दंतेवाड़ा, कांकेर, कोंडागांव, नारायणपुर, सुकमा, मुंगेली, बलौदाबाजार, बलरामपुर, जशपुर, कोरिया, सूरजपुर अऊ सरगुजा जिला मन के आदिवासी विकासखंडों म लागू करे जाही। चिराग परियोजना बस्तर संभाग के बस्तर जिला के विकासखंड बकावंड व बस्तर, कांकेर जिला के विकासखंड चारामा, नरहरपुर म, जिला कोंडागांव म विकासखंड बड़े राजपुर अऊ माकड़ी, नारायणपुर जिला के विकासखंड नारायणपुर, दंतेवाड़ा जिला के विकासखंड दंतेवाड़ा व कटेकल्याण, सुकमा जिला के विकासखंड छिंदगढ़़ अऊ सुकमा, बीजापुर जिला के विकासखंड भोपालपट्नम अऊ भैरमगढ़ के चुने गए ग्राम मन म क्रियान्वयन करे जाही। एखर से बस्तर अंचल म खेती-किसानी ल समृद्ध अऊ लाभदायी बनाए म मदद मिलही अऊ बस्तर अंचल के किसान परंपरागत खेती के संगें-संग आधुनिक खेती कोति आगू बढ़हीं । एखर से उंखर माली हालात बेहतर होही अऊ ऊंखर जीवन म खुशहाली के एक नवा दौर शुरू होही।