रायपुर, 23 फरवरी 2021। बिलासपुर वनमंडल के कोपरा गांव म एक दिन के चिरई तिहार ‘हमर चिरई, हमर चिन्हारी’ के आयोजन करे गीस। ये आयोजन करे बर वन मंत्री श्री मोहम्मद अकबर ह कहे रहिन। ये कार्यक्रम म पर्यावरण संरक्षण संबंधी फोटोग्राफी, चित्रकला अऊ रंगोली आदि प्रतियोगिता के घलोक आयोजन करके भाग लेवईया मन ल इनाम देहे गीस।
ये बेरा म विधायक तखतपुर श्रीमती रश्मि सिंह ह ये कार्यक्रम ल मनखे मन उपर पर्यावरण संरक्षण के प्रति जागरूकता लाय म महत्वपूर्ण बताइन। उमन कार्यक्रम म अपन विचार व्यक्त करत मनखे मन ल चिरई मन के संरक्षण अऊ संवर्धन बर प्रेरित घलोक करिन। ये बेरा म पहुना मन संग पक्षी प्रेमी अऊ गांव वाले मन कोति ले विशेष रूप ले बनाय गए मचान ले उत्साह के संग पक्षी मन के विहंगम दृश्य के अवलोकन करे गीस। कोपरा म ये पूरा कार्यक्रम प्लास्टिक मुक्त कार्यक्रम के रूप म घलोक आयोजित होइस। एखर तहत उहां जगा-जगा कचरा डब्बा के व्यवस्था करे गए रहिस। कार्यक्रम के अंत के समय म संझा कुन कोपरा जलाशय के आसपास के जगा मन के साफ-सफाई तको करे गीस। कार्यक्रम के समय मनखे मन ल पर्यावरण संग पक्षी मन के संरक्षण अउ संवर्धन बर भरपूर संदेश दे गीस।
ये कार्यक्रम कमिश्नर बिलासपुर श्री संजय अलंग, राज्य जैव विविधता बोर्ड के सदस्य सचिव श्री अरूण पांडेय, मुख्य वन संरक्षक श्री अनिल सोनी, श्रीमती संजीता गुप्ता अऊ श्री नाविद शुजाऊद्दीन, उप संचालक अचानकमार टाईगर रिजर्व कोनी श्री सत्यदेव शर्मा, वनमंडलाधिकारी श्री कुमार निशांत संग पक्षी-प्रेमी अऊ करीबन 500 गांव वाले मन के उपस्थिति म संपन्न होइस।
हमर चिरई-हमर चिन्हारी : बिलासपुर के कोपरा म पक्षी महोत्सव संपन्न : मनखे मन ल पर्यावरण संग चिरई मन ल सरेखे के अऊ उंकर बढ़वार बर देहे गीस संदेश
