रायपुर, राष्ट्रीय स्वास्थ्य मिशन कोति ले संचालित राष्ट्रीय बाल स्वास्थ्य कार्यक्रम चिरायु योजना लइका मन बर वरदान साबित होवत हे। नारायणपुर जिला के बहुत अकन लइका ए योजना ले लाभांवित होवत हें इही कड़ी म ओरछा विकासखण्ड अंतर्गत ग्राम नेड़नार के भवानी उसेण्डी पिता मुर्रा राम उसेण्डी जन्मजात हदय रोग ले ग्रसित रहिस। जेकर पहिचान विकासखण्ड चिरायु दल ह करे रहिस। तीन साल के भवानी उसेण्डी के पिता किसान हे अउ वोखर माता श्रीमती शांति उसेण्डी गृहणी हे। कमजोर आर्थिक स्थिति के सेती वोकर हृदय रोग के उपचार कराए म दिक्कत आवत रहिस।
चिरायु दल के आंगनबाड़ी केन्द्र मन म नियमित स्वास्थ्य परीक्षण के समय डॉ. सतीश उसेण्डी, डॉ. सिलवंती सिहं, फार्मासिस्ट मदन शोरी, लैब टेक्निशीयन दिलीप उसेण्डी अउ ए.एन.एम. जसमती कचलाम के पूरा टीम ह केस के पहिचान करिस एखर बाद लइका के माता पिता ल रायपुर के उच्च संस्थान म लइका के निःशुल्क ईलाज के सम्पूर्ण जानकारी देहे गीस।
मुख्य चिकित्सा अउ स्वास्थ्य अधिकारी डॉ. एस.एस. राज, खण्ड चिकित्सा अधिकारी डॉ. हुर्मेन्द्र जुर्री अउ जिला कार्यक्रम प्रबंधक राजीव बघेल के कुशल मार्गदर्शन म चिरायु दल के संग भवानी उसेण्डी ल श्री बालाजी अस्पताल रायपुर ले जाके निःशुल्क सफल ऑपरेशन करवाए गीस। सफल ऑपरेशन के बाद परिवार अउ पालक म खुशी के माहौल हे। पालक मन ह स्वास्थ्य विभाग अउ चिरायु टीम ओरछा के आभार जताए हें।
चिरायु योजना के तहत् भवानी के जन्मजात हृदय रोग के होइस सफल ऑपरेशन
