हृदय रोग के होइस सफल आपरेशन, अमीषा ल मिलीस नवा जीवन
संजीवनी अस्पताल म निःशुल्क ऑपरेशन संग मिलीस आन मेडिकल सुविधा
जशपुर, चिरायु योजना आज जरूरतमंद परिवार खातिर वरदान साबित होवत हे। ए योजना ह लइका मन ल नवा जिंदगी देवत हे, संगेच गरीब परिवार मन म खुसी घलोक लहुटावत हे। इही कड़ी म चिरायु योजना ले ही दिल के बीमारी ले जूझत किसान परिवार म जनमे अमीषा केरकेट्टा ल नवजीवन देहे के काम करे हे। मुख्यमंत्री श्री विष्णु देव साय के अगुवई म आज लइका मन के जटिल बीमारी अऊ जन्मजात विकृति मनके इलाज देश के सबले बढि़या अस्पताल मन म निःशुल्क संभव हो पात हे।
चिरायु योजना ले 44 गंभीर बीमारी मन के इलाज
चिरायु योजना (राष्ट्रीय बाल स्वास्थ्य कार्यक्रम) छत्तीसगढ़ सरकार के एक महत्वपूर्ण योजना हे। ए योजना के तहत 0 ले 18 साल तक के लइका मन म जन्मजात हृदय रोग, मोतियाबिंद, कटे-फटे होंठ, टेढ़ा-मेढ़ा हाथ पांव संग 44 गंभीर बीमारी मन के इलाज शासन कोति ले कराए जात हे। जांच के बाद 44 प्रकार के बीमारी अऊ विकृति के जानकारी होए के बाद चिरायु योजना ले लइका मन के इलाज कराए जाथे। जरूरत होए म लइका मन ल देश भर के अच्छा हॉस्पिटल म ले जाके उपचार घलोक कराए जाथे।
अमीषा के हृदय रोग के होइस सफल इलाज
मनोरा विकासखंड के छोट कन गांव ओरडीह के एक जनजातीय परिवार म जनमे अमीषा केरकेट्टा अक्सर बीमार रहत रहिस। परिवार वाले मन घेरी-बेरी ओखर तबीयत बिगड़े ले चिंता करंय। जब अमीषा के जांच जिला चिकित्सालय जशपुर म चिरायु टीम ह करिस, त पता चलिस के वो जनम ले ही हृदय रोग ले पीड़ित हे। खेती-किसानी करके परिवार के भरण-पोषण करइया ओखर पिता अशोक केरकेट्टा ये सुनके परेशान हो गे। वोखर आगू सबले बड़का चिंता रहिस के ओ ह अतीक महंगा इलाज के खरचा कइसे उठा पाही। तभे डाक्टर मन ह ओ ला चिरायु योजना के बारे म जानकारी दीन। ये सुनके परिवार ल मानो एक नवा भरोसा होइस। योजना के तहत अमीषा ल सरकार के खरचा म बेहतर उपचार खातिर श्री सत्य साईं संजीवनी अस्पताल, नवा रायपुर भेजे गीस। जिहां विशेषज्ञ डॉक्टर मन के टीम ह ओखर सफल ऑपरेशन करिस। कुछेक समय म अमीषा पूरा स्वस्थ हो गे।
गरीब परिवार मन खातिर वरदान हे चिरायु योजना
आज 11 साल के अमीषा एकदम स्वस्थ हे, संगेच पहिली ले जादा उत्साह अऊ ऊर्जा ले भरे हे। ओखर मुस्कुरात चेहरा अब ओखर माता-पिता के जीवन ल खुसी ले भर देहे हे। परिवार वाले मन ह मुख्यमंत्री श्री विष्णुदेव साय अऊ डॉक्टर मन के प्रति आभार व्यक्त करे हें। उमन कहिन के गरीब परिवार मन खातिर ये योजना कोनो वरदान ले कम नइ हे। सरकार ह गरीब मन के पीरा ल समझे हे अऊ इलाज खातिर बनेच अस्पताल मन म भेजके निःशुल्क इलाज करावत हे। जानबा हे के चिरायु योजना के तहत आंगनबाड़ी केंद्र , स्कूल मन म जाके लइका मन के संपूर्ण स्वास्थ्य के जांच करे जाथे।