CHHATTISGARHI NEWS: कवर्धा, जिला मुख्यालय के वार्ड क्रमांक-9 के रहवइया कृष्णा कहार के जीवन म ‘चिरायु योजना’ ह एक बड़ सकारात्मक बदलाव लाए हे। दृष्टि संबंधी समस्या के सेती कृष्णा ला रोजमर्रा के काम करे अउ पढ़ई करे म बहुत दिक्कत होवत रहिस। स्कूल जा के कक्षा म पढ़े म भारी परेशानी झेले बर पड़त रहिस, जेकर सेती परिवार घलो बहुत चिंतित रहय।
सेवा संकल्प अभियान के तहत स्वास्थ्य विभाग ह चिरायु योजना के माध्यम ले कृष्णा के स्वास्थ्य के समय म जांच कराइस। जांच के बाद चिकित्सक मन के परामर्श के अनुसार आवश्यक उपचार अउ सफल ऑपरेशन कराय गीस। ऑपरेशन के बाद कृष्णा के दृष्टि म उल्लेखनीय सुधार आइस, अउ अब ओला फेर बने दिखे लगे हे।
आंखी के ज्योति मिले के बाद कृष्णा अब बिना कोनो परेशानी के अपन दैनिक गतिविधि मन ला आसानी ले करत हे। ओखर पढ़ई के प्रति रुचि अउ लालसा फेर बाढ़ गे हे, अउ अब वो नियमित रूप से स्कूल जावत हे। दृष्टि म सुधार होय के सेती ओखर आत्मविश्वास म घलो जबरदस्त सकारात्मक बदलाव आए हे। कृष्णा के ये बदले स्थिति ला देख के ओखर परिवार म खुशी के माहौल हे।
परिवार ह अपन अनुभव साझा करत बताइस के समय म जांच अउ सही उपचार मिले ले लइका के जीवन म बड़का बदलाव आथे। सेवा संकल्प अभियान के तहत चिरायु योजना ह लइका मन बर स्वस्थ अउ उज्ज्वल भविष्य बनाथे।
चिरायु योजना ले लहुटिस कृष्णा के आंखी के ज्योति, पढ़ई म बाढि़स चिभिक
