बलौदाबाजार: चिरायु योजना ले संवरत हे जिंदगी, 6 बछर के श्रेया अब सुन पाही अवाज

बलौदाबाजार,14 फरवरी 2024। कलेक्टर श्री चंदन कुमार के निर्देश म स्कूल अऊ आंगनबाड़ी केंद्र मन म लइका मन के स्वास्थ्य परीक्षण करत राष्ट्रीय बाल सुरक्षा कार्यक्रम (चिरायु) के बलौदा बाज़ार टीम ह दू लइका मन म स्तन म गांठ अऊ जन्मजात श्रवण बधिता के पहिचान करके उंखर उपचार कराए हे। बलौदाबाजार के विकासखंड चिकित्सा अधिकारी डॉ अभिजीत बनर्जी के मुताबिक ओ दुनों लइका मन के पहिचान बलौदाबाजार के चिरायु टीम ह करे रहीस हे। ग्राम अर्जुनी के 6 बछर के नोनी श्रेया ध्रुव के पिता किसान हे। नोनी के पिता ह जानकारी दीस के जन्म ले ही वोखर बेटी ल सुने के समस्या रहिस हे कई जगा जांच करवाए के बाद चिरायु दल के संपर्क म आए म नोनी के ऑपरेशन के व्यवस्था करे गीस। नोनी के कान म कॉक्लियर मशीन लगाइए गीस जेखर से अब ओला सुनाई देहे लगे हे। ए ऑपरेशन म चिरायु के डॉ किरण देवांगन के टीम ह सहयोग करिस। निजी अस्पताल म एकर उपचार 2 लाख ले ऊपर के होथे, फेर चिरायु के माध्यम ले होए म एक रूपिया घलोक परिवार ल देना नइ परिस। वोखर पिता ह ए सफल आपरेशन म राज्य सरकार अउ जिला प्रशासन के प्रति आभार व्यक्त करत धन्यवाद देहे हे।
अइसनहे एक दूसर प्रकरण म बलौदा बाजार शहर के एक 16 बछर के किशोर नोनी के चिरायु के डॉ आरजू परवीन के टीम ह स्तन म गांठ के पहिचान करिस। जेखर उपचार रायपुर के डॉ भीमराव अंबेडकर अस्पताल म करे गीस। जिला म चिरायु टीम ह स्तन के गांठ के पहिचान करके उंखर उपचार करे गीस। चिरायु म अइसन केस मिलना पहला मामला हे। नोनी के घर वाले मन ह घलोक जिला प्रशासन के प्रति आभार व्यक्त करे हें। मुख्य चिकित्सा अउ स्वास्थ्य अधिकारी डॉ एम पी महिस्वर ह बताइस के चिरायु टीम ह स्कूल अउ आंगनवाड़ी केंद्र मन म लइका मन के स्वास्थ्य परीक्षण करत हे। जेमां कोनो प्रकार के बीमारी पाय जाय म उंखर उपचार के निःशुल्क व्यवस्था करे जाथे।