रायपुर, 7 जुलाई 2020। 15 जुलाई ले सरकारी अंग्रेज़ी माध्यम के स्कूल मन म ऑनलाइन पढ़ाई शुरु हो जाही। प्रदेश के सबो अंग्रेज़ी मीडियम स्कूल बर भर्ती जारी हे। मैरिट अउ लाटरी सिस्टम ले बच्चा मन के दाख़िला होही।
लोक शिक्षण संचालक जितेन्द्र शुक्ला ह बताइस कि प्रदेश म 40 अंग्रेज़ी माध्यम के स्कूल तइयार कर ले गे हे अउ स्टाफ बर संविदा नियुक्ति करे जावत हे। 15 जुलाई ले ऑनलाइन पढ़ाई के तइयारी कर ले गे हे। ये स्कूल सोसाइटी के माध्यम ले संचालित होही अउ ये सोसाइटी के अध्यक्ष कलेक्टर मन ल बनाये गे हे।
उंखर कहना हे कि स्कूल मन म भर्ती प्रक्रिया के बात हे त एखर बर दिशा निर्देश जारी कर देहे गए हे। भर्ती प्रक्रिया म पूरा पारदर्शिता होही दाख़िला बर कोनो प्रवेश परीक्षा के प्रावधान नई हे। अगर निर्धारित सीट ले आवेदन कम आही त सीधी भर्ती होही अउ आवेदन जादा होय के स्थिति म मैरिट सिस्टम अउ लॉटरी पद्धति ले दाख़िला देहे जाही। एखर संग ही ये घलो निर्देश देहे गए हे कि जोन स्कूल मन म अंग्रेज़ी मीडियम खोले गे हे ओमा पढ़त बच्चा अगर उहँचे पढ़ना चाहत हे त ओमन ल प्राथमिकता दे जाही।
निम्न अउ मध्यम वर्गीय लोग मन के बच्चा इंग्लिश मीडियम म पढ़ना चाहत हे लेकिन वो पढ़ नई पात एखर सेती अइसन लोग मन बर ये स्कूल खोले जावत हे अउ ओ मन ल प्राथमिकता दे जाही संग ही कहिन कि जोन ज़िला मन म अउ अइसन स्कूल मन के ज़रूरत होही उंहा के अभिभावक सुझाव दे सकत हे।
