स्वच्छता हम सब के हे जिम्मेदारी – मुख्यमंत्री श्री विष्णु देव साय

मुख्यमंत्री श्री साय ह स्वच्छता दीदी मन ल करिन सम्मानित, कहिन – देश ल स्वच्छ अऊ स्वस्थ बनाए म निभावत हे अहम भूमिका
जशपुर, मुख्यमंत्री श्री विष्णु देव साय ह कहिन के स्वच्छता केवल एक अभियान भर नो हे, भलुक हम सबो के सामूहिक जिम्मेदारी हे। उमन कहिन के देश ल स्वच्छ अऊ स्वस्थ बनाए म हमर स्वच्छता दीदी मन के भूमिका बहुत महत्वपूर्ण रहे हे, जे ह निष्ठा, मेहनत अऊ सेवा-भावना के संग समाज ल नवा दिशा देहे हे। मुख्यमंत्री श्री साय ह आज जशपुर जिला के ग्राम बगिया म आयोजित सम्मान समारोह म स्वच्छता दीदी मन ल साड़ी, स्मृति चिन्ह अऊ प्रशस्ति पत्र देहे कर सम्मानित करिन।
मुख्यमंत्री श्री साय ह कहिन के जशपुर एक प्राकृतिक रूप ले समृद्ध अऊ सुंदर जिला हे, फेर पहिली जब ओ मन गांव मन के दौरा करत रहिन, त सड़क मन के किनारे फैले कचरा गांव मन अऊ शहर मन के सुंदरता ल धूमिल कर देत रहिस। ए स्थिति ल बदले बर प्रधानमंत्री श्री नरेन्द्र मोदी जी ह 2 अकटूबर 2014 के स्वच्छ भारत मिशन के शुरुआत करके एला राष्ट्रीय जनआंदोलन म बदलीन। उमन खुदे झाड़ू उठाके मनखे मन ल प्रेरित करिन अऊ गांव-गांव, शहर-शहर स्वच्छता के अलख जगाइन। उमन हर नागरिक ल स्वच्छ अऊ सम्मानजनक जीवन जीए के अधिकार देवाए के प्रयास करिन।
मुख्यमंत्री ह कहिन के ए अभियान म हमर स्वच्छता दीदी मन के भागीदारी बहुत महत्वपूर्ण रहे हे। ऊंखर अथक मेहनत अऊ समर्पण के ही परिणाम हे के आज जशपुर जिला ह स्वच्छता के क्षेत्र म राष्ट्रीय स्तर म अपन अलग पहिचान बनाए हे। ओ मन सही म सम्मान के पात्र हे, काबर के उमन हमला स्वच्छ अऊ स्वस्थ वातावरण देहे म अमूल्य योगदान देहे हें। मुख्यमंत्री ह सबो नागरिक मन ले आह्वान करिन के ओ मन अपन घर, मोहल्ला, चौराहा, मंदिर अऊ सार्वजनिक स्थल मन के सफाई ल अपन कर्तव्य मानंय अऊ स्वच्छता ल अपन आदत म सामिल करंय।