मुख्यमंत्री ह कुम्हारी के नवा बने क्रिकेट स्टेडियम के करिन लोकार्पण

रायपुर, मुख्यमंत्री श्री भूपेश बघेल ह आज कुम्हारी म साढ़े चार करोड़ रुपिया के लागत ले बने स्टेडियम के लोकार्पण करिन। ये नवा बने स्टेडियम म आयोजित पहिली मैच कुम्हारी के नागरिक मन के सुरता म हमेशा बर दरज हो गे। क्रिकेट मैच म बैट्समैन रहिन मुख्यमंत्री श्री भूपेश बघेल अऊ बॉल रहिस नगरीय प्रशासन मंत्री डॉ शिव डहरिया के हाथ म। नगरीय प्रशासन मंत्री ह जेन पहली बाल डालिन, ओला अंपायर ह वाइट करार दीस। मंत्री के दुसरइया बाल म मुख्यमंत्री ह चौंका जड़ दीन अऊ पूरा स्टेडियम ताली के अवाज ले गूंज गे। मुख्यमंत्री ह स्टेडियम के निर्माण काम ल सहराइन अऊ कहिन कि अइसन खेल के बढ़िया अधोसंरचना ले खिलाड़ी मन के मनोबल बाढ़ही अऊ कुम्हारी म खेल प्रतिभा मन ल निखारे म मदद मिलही।
मुख्यमंत्री ह ये मौका म 42 करोड़ के निर्माण काम मन के लोकार्पण अउ भूमि पूजन घलोक करिन ए काम मन म 10 करोड़ रूपिया के लोकार्पण काम अऊ 31 करोड़ के भूमि पूजन काम सामिल हे। मुख्यमंत्री ह कुम्हारी के नागरिक मन के प्रस्ताव म स्टेडियम के नाम स्वर्गीय मिनी माता के नाम म रखे के घोषणा घलोक करिन। मुख्यमंत्री ह ये मौका म कहिन कि कुम्हारी नगर पालिका म सरलग विकास के काम करे जात हे आज इहां भव्य स्टेडियम अऊ नगर पालिका भवन के लोकार्पण करे गए हे। दुनों ही निर्माण काम बहुत बढ़िया तरीका ले हावत हे।
मुख्यमंत्री ह कहिन कि कुम्हारी म नागरिक अधोसंरचना के दृष्टि ले तेजी ले विकास काम होवत हे। 100 करोड़ रूपिया के निर्माण काम बीते 3 साल म होए हे अऊ कुछ म काम चलत हे। मुख्यमंत्री ह कहिन कि चाहे तालाब सौंदर्यीकरण के विसय हो, स्‍वामी आत्मानंद स्कूल होवय या उच्‍च शिक्षा बर कॉलेज के निर्माण होवय। कुम्हारी के सर्वांगीण विकास के दिशा म सरकार काम करत हे। ये मौका म नगरीय प्रशासन मंत्री डॉ शिव डहरिया ह कहिन कि मुख्यमंत्री के मार्गदर्शन म कुम्हारी नगर पालिका म तेजी से निर्माण काम होवत हे अऊ नागरिक सुविधा मन के विकास होवत हे। नगर पालिका अध्यक्ष श्री राजेश्वर सोनकर ह मुख्यमंत्री के प्रति आभार व्यक्त करिस। ये दौरान संभागायुक्त श्री महादेव कांवड़े, आईजी श्री बद्री नारायण मीणा, कलेक्टर श्री पुष्पेंद्र कुमार मीणा अउ एसपी डॉ अभिषेक पल्लव उपस्थित रहिन।