मुख्यमंत्री श्री बघेल ह ‘घाघ अऊ भडुरी’ पुस्तक के करिन विमोचन

रायपुर, 09 फरवरी 2021। मुख्यमंत्री श्री भूपेश बघेल ह राजधानी स्थित अपन निवास कार्यालय म श्री दीपन कुमार चक्रवर्ती कोति ले ‘घाघ अऊ भडुरी’ के कहावत मन ल सकेल के प्रकाशित कराए गए पुस्तक के विमोचन करिन। मुख्यमंत्री श्री बघेल ह ‘घाघ अऊ भडुरी’ पुस्तक के संकलनकर्ता अऊ संपादक श्री चक्रवर्ती ल ए प्रकाशन बर बधाई देवत कहिन कि ये पुस्तक पाठक मन बर बहुत लोकप्रिय सिद्ध होही।
जानबा हे कि भडुरी के कहावत प्रायः कृषि अऊ वर्षा-विषयक हे। उंखर कहावत छत्तीसगढ़ संग बिहार, मध्यप्रदेश अऊ
संयुक्त प्रांत मन ले लेके सब्बो राजपुताना अऊ पंजाब तक फैले हे। इंकर कहावत के कुछ उदाहरन-‘अगसर खेती अगसर
मार-कहें घाघ ते कबहुं नइ हार’। घाघ कहिथे कि जेन सबले पहिली खेत बोथे अऊ जेन सबले पहिली मारथे, ओ मन कभू नइ हारयं। अइसनहे ‘प्रातः काल खटिया ते उठी कै पिअइ तुरंतै पानी। कबहूं घर म बैद नइ अइहैं बात घाघ कै जानी’। बिहनिया सुतउठ के खटिया म तुरंते पानी पी लेहे ले कभू बीमार नइ परय, ये बात घाघ के आजमाए हे। ‘ईख तिस्सा-मोहूं बिस्सा’ मने ईख के पैदावार तीस गुना होथे हे अऊ गेहूं के बीस गुना। ये बेरा म उच्‍च शिक्षा मंत्री श्री उमेश पटेल, उद्योग मंत्री श्री कवासी लखमा, सरगुजा क्षेत्र आदिवासी विकास प्राधिकरण के उपाध्यक्ष श्री बृहस्पति सिंह अऊ विधायक रायगढ़ श्री प्रकाश नायक आदि उपस्थित रहिन।