मुख्यमंत्री ह बेमेतरा म करिन 98 करोड़ के विकास काम मन के लोकार्पण-भूमिपूजन

रायपुर, मुख्यमंत्री श्री भूपेश बघेल आज बेमेतरा जिला के प्रवास के समय 97 करोड़ 82 लाख रूपिया के कई ठन विकास कार्य मन के लोकार्पण-भूमिपूजन करिन। एमां 64 करोड़ 42 लाख रूपिया के 57 कार्य मन के भूमिपूजन अऊ 33 करोड़ 40 लाख रूपिया के 13 विकास काम मन के लोकार्पण सामिल हे। कार्यक्रम म उमन कई ठन हितग्राही मूलक योजना मन के तहत करीबन 13 लाख रूपिया के सामाग्री के वितरण घलोक करिन। कृषि अऊ जलसंसाधन मंत्री श्री रविन्द्र चौबे, जिला के प्रभारी मंत्री श्रीमती अनिला भेड़िया, खाद्य अऊ नागरिक आपूर्ति मंत्री श्री अमरजीत भगत, विधायक बेमेतरा श्री आशीष कुमार छाबड़ा, विधायक नवागढ़ श्री गुरूदयाल सिंह बंजारे, जिला पंचायत अध्यक्ष श्रीमती कविता साहू, बहुत अकन जनप्रतिनिधिगण अऊ बड़ी संख्या म नागरिकगण ये बेरा म उपस्थित रहिन।
मुख्यमंत्री ह जऊन पूरा होए काम मन के लोकार्पण करिन, एमां 17 करोड़ 62 लाख रूपिया के लागत ले निर्मित हथमुड़ी व्यपर्वतन योजना के नहर रिमाण्डलिंग अऊ लाइनिंग काम, 4 करोड़ 65 लाख रूपिया के लागत ले शासकीय पी.जी कॉलेज बेमेतरा के भवन, एक करोड़ 31 लाख रूपिया के लागत ले लाइवलीहुड कॉलेज म 50 सिटर बालक छात्रावास, 5 करोड़ 77 लाख रूपिया के लागत ले जिला मुख्यालय बेमेतरा म शासकीय घर, बेमेतरा ब्लाक के नवागांव म 58 लाख रूपिया के लागत ले शासकीय हाई स्कूल उन्नयन काम, 2 करोड़ 25 लाख रूपिया के लागत ले साजा विधानसभा क्षेत्र के हाथीडोब, अकलवारा, जाता-मूसवाडीह नल-जल प्रदाय योजना, बोरतरा, हरडूवा आवर्धन नल-जल प्रदाय योजना के लोकार्पण सामिल हे।
मुख्यमंत्री जऊन नवा स्वीकृत कार्य मन के भूमिपूजन करिन, एमां मुख्य रूप ले नगर पालिका परिषद के अंतर्गत एक करोड़ 76 लाख 49 हजार रूपिया के कई ठन निर्माण काम, 7 करोड़ 32 लाख रूपिया के लागत ले शिवनाथ उद्वहन सिंचाई योजना के मुख्य नहर, माइनर नहरों के रिमाडलिंग अऊ पक्के कार्य के जीर्णोद्धार अऊ नहर विस्तार काम, एक करोड़ 37 लाख रूपिया के लागत ले जिला चिकित्सालय बेमेतरा बर चार नग स्टाफ क्वार्टर, एक करोड़ 16 लाख रूपिया के लागत ले प्राथमिक स्वास्थ्य केन्द्र नांदघाट अऊ आनंदगांव म चार नग स्टाफ क्वार्टर निर्माण संग बहुत अकन निर्माण काम सामिल हे।