– 11 करोड़ रूपिया के लागत ले बने मंडी के उद्घाटन के बेरा म अपन संबोधन म कहिन मुख्यमंत्री श्री भूपेश बघेल
– किसान मन के संग करिन जेवन, उद्यानिकी फसल मन के बेहतरी बर करिन गोठ-बात
दुर्ग, मुख्यमंत्री श्री भूपेश बघेल ह आज धमधा म 55 करोड़ रूपिया के लागत ले धमधा ब्लॉक म कई ठन काम मन के लोकार्पण अऊ भूमिपूजन अऊ सामान वितरण करिन। ये मौका म उमन 11 करोड़ रूपिया के लागत ले बने सब्जी अऊ फल मंडी के लोकार्पण करिन। संगेच 1 करोड़ 75 लाख रूपिया के लागत ले बने सामुदायिक स्वास्थ्य केंद्र अऊ वरिष्ठ कृषि विस्तार अधिकारी भवन के लोकार्पण घलोक करिन। संगें-संग जलसंसाधन विभाग के 18 करोड़ रूपिया के योजना के लोकार्पण अऊ पीएचई विभाग के 15 करोड़ रूपिया के योजना के भूमिपूजन घलोक करिन।
उमन ये बेरा म अपन संबोधन म कहिन कि धमधा के पहिचान छै आगर, छै कोरी तालाब के हे। एखर ऐतिहासिक पहिचान हमेशा ले रहे हे। अब एखर पहिचान पताल के उत्पादन अऊ उद्यानिकी फसल ले घलोक बने हे। धमधा के किसान मन ह देश अऊ देश के बाहिर बांग्लादेश अऊ पाकिस्तान म घलोक सप्लाई करथें। किसान मन के ये उपलब्धि शानदार रहे हे। एखर पीछू कृषि मंत्री श्री रविन्द्र चौबे के मेहनत घलोक हे। उमन मंडी के जेन योजना बनाइन, ओला हमन पास करेन। उमन लउहेच अऊ बने सहिन एला करवाईन। ये मंडी के बन जाय ले किसान मन ल फसल ल उचित मूल्य मिल सकही।
ये मौका म मुख्यमंत्री ह धमधा के स्वास्थ्य केंद्र ल 50 बिस्तर तक अपडेट करे के घोषणा करिन। संगेच उमन पीएससी, सेना भर्ती अऊ आन प्रतियोगी परीक्षा मन म के कोचिंग घलोक धमधा म सुरू करे के घोषणा करिन। एखर संगेच उमन एक करोड़ के लागत ले स्टेडियम के घोषणा घलोक करिन। एकर संगेच धमधा महाविद्यालय म ऑडिटोरियम बर तको मुख्यमंत्री ह घोषणा करिन। उमन धमधा म तरिया मन के सौंदर्यीकरण के घोषणा घलोक करिन। उमन बंधुआ तालाब के सौंदर्यीकरण बर एक करोड़ रुपिया के राशि के घोषणा करिन। ये मौका म धमधा म सामुदायिक भवन बर 1 करोड़ रुपए के घोषणा करिन।
अपन उद्बोधन म मुख्यमंत्री ह कहिन कि धमधा के विकास बर सरकार ह हर संभव कदम उठाए हे अऊ विकास काम सरलग करे जाही।
उमन कहिन कि अब धमधा के पहिचान उद्यानिकी फसल ले हे। उद्यानिकी फसल के विकास बर मंडी बनाए गए हे, एखर संग किसान मन ल हर संभव मदद करे अऊ नवाचार अपनाए बर कई योजना बनाय गए हे। ये मौका अपन संबोधन म कृषि मंत्री श्री रविंद्र चौबे ह कहिन कि धमधा के किसान मन बर मंडी के सुरू होना बहुत शुभ संकेत हे, मंडी के सुरू होए के बाद अब इहां के किसान मन ल देशभर के मार्केट मिल सकही। पहिली घलोक हमार किसान हैदराबाद ले इलाहाबाद तक अपन उत्पाद पहुंचात रहिन, अब मंडी के माध्यम ले ओ मन ल उचित दाम मिल पाही। ये मुख्यमंत्री श्री भूपेश बघेल के सरकार के सुग्घर भेंट धमधा ब्लाक ल हे। उमन कहिन कि मोती नाला अऊ रौंदा जलाशय ले सिंचाई के व्यवस्था अऊ बेहतर हो सकही। ए 3 साल म धमधा म सिंचाई के दायरा बढ़ाय बर बड़े काम करे गए हे।
3 करोड़ रूपिया के वितरण कार्य- ये मौका म मुख्यमंत्री ह हितग्राही मन ल सामान वितरण घलोक करे गीस। उमन 50 किसान मन ल ट्रैक्टर वितरण करिन। मत्स्य कृषक मन ल घलोक नाव, जाल, मत्स्य आहार आदि वितरित करे गीस। एखर संगेच उमन समाज कल्याण विभाग के हितग्राही मन ल घलोक बाइक प्रदान करिन। ये मौका म जिला मंडी बोर्ड अध्यक्ष श्री अश्विनी साहू ह घलोक अपन संबोधन दीन। उमन मंडी के अनुपम उपहार बर मुख्यमंत्री के प्रति आभार व्यक्त करिन। नगर पंचायत अध्यक्ष श्रीमती सुनीता गुप्ता ह घलोक मुख्यमंत्री के प्रति आभार व्यक्त करिस। ये मौका म कार्यक्रम म पूर्व विधायक श्री प्रदीप चौबे , पूर्व विधायक श्रीमती प्रतिमा चंद्राकर, जनपद अध्यक्ष श्रीमती सरस्वती रात्रे, श्रीअविनाश चौबे अऊ आन जनप्रतिनिधि उपस्थित रहिन। मौका म कलेक्टर डॉ सर्वेश्वर नरेंद्र भुरे ह अपन प्रतिवेदन म 3 साल के धमधा के उपलब्धि मन के जानकारी दीन। संभागायुक्त श्री महादेव कांवड़े, आईजी श्री ओपी पॉल, एसपी श्री बद्रीनारायण मीणा, एसडीएम श्री ब्रजेश क्षत्रिय संग आन अधिकारी ए मौका म उपस्थित रहिन।
किसान मन के संग करिन जेवन-
ये मौका म मुख्यमंत्री ह किसान मन के संग जेवन घलोक करिन। उमन ये बेरा म किसान मन ले उद्यानिकी फसल मन के स्थिति के बारे म गोठ-बात करिन। उमन किसान मन ले ये क्षेत्र म अऊ बेहतर योजना बनाए बर चर्चा घलोक करिन। उमन किसान मन ले कहिन कि आप मन ह जेन तेजी ले उद्यानिकी फसल के क्षेत्र म धमधा ल नवा पहिचान देहे हव। ओखर से हमर ये सपना लउहेच फलित होही।