दुर्ग, 16 फरवरी 2020। मुख्यमंत्री भूपेश बघेल ह 15 फरवरी हार्वर्ड यूनिवर्सिटी म कॉस्ट एंड पॉलिटिक्स विसय उपर व्याख्यान दीन। ये बेरा म भूपेश बघेल ह उपस्थित हार्वर्ड के पढ़ईया लइका मन ल नरवा, गरूवा, घुरूवा अउ बारी योजना के विसय म परखर जानकारी दीन। उहां के पढ़ईया मन बर ह ये नवा उदीम ह अचरज के जिनिस रहिस, उमन बड़ गंभीरता ले मुख्यमंत्री सुनिन अऊ ये नवा उदीम बड़ सहराईन। कार्यक्रम के मॉडरेटर डॉ. सुरज एंगड़े रहिन। उमन कॉस्ट एंड पॉलिटिक्स उपर विस्तार ले चर्चा करिन।
कार्यक्रम के बेरा म मुख्यमंत्री श्री भूपेश बघेल ले हार्वर्ड म पढ़त छत्तीसगढ़़ के पढ़ईया मन ह मुलाकात घलोक करिन। ये बेरा म उहा के पढ़ईया मन ह मुख्यमंत्री श्री बघेल ले छत्तीसगढ़़ ले हार्वर्ड यूनिवर्सिटी म स्टूडेंट स्पांसर करे के संबंध म मांग घलोक रखिन। मुख्यमंत्री श्री बघेल ह ये संबंध म अधिकारी मन ल हुकुम दीन। संगेच हार्वर्ड कोति ले आयोजित रतिहा जवन म मुख्यमंत्री सामिल होइन।
