धर्मशाला विस्तार बर 50 लाख देहे के घोषणा
रायपुर, मुख्यमंत्री श्री भूपेश बघेल ह काली बलौदाबाजार-भाटापारा जिला के अंतर्गत गिरौदपुरी धाम के तीर मड़वा गांव म प्रगतिशील सतनामी समाज कोति ले निर्मित सतनाम धर्मशाला के लोकार्पण करिन। धर्मशाला के निर्माण करीबन ढाई करोड़ रूपिया के लागत ले समाज के मनखे मन कोति ले आपसी सहयोग ले करे गए हे।
मुख्यमंत्री ह धर्मशाला के विस्तार बर 50 लाख रूपिया प्रदान करे के घोषणा करिन। उमन प्रगतिशील सतनामी समाज के तरफ ले धर्मशाला निर्माण के दानदाता मन ल सम्मानित करिन। नगरीय प्रशासन अउ विकास मंत्री श्री शिव कुमार डहरिया ह लोकार्पण समारोह के अध्यक्षता करिन। विशेष अतिथि के रूप म धर्मगुरु बालदास, गुरु सतखोजन दास, गुरु खुशवंत साहेब संग विधायक श्री चंद्रदेव राय, सुश्री शकुंतला साहू, विधायक श्री मोहन मरकाम, विधायक श्री पुन्नूलाल मोहले, विधायक श्री भुनेश्वर बघेल, जिला पंचायत अध्यक्ष श्रीमती पूनम मार्कण्डेय उपस्थित रहिन।
मुख्यमंत्री श्री भूपेश बघेल ह ये बेरा म जनता ल संबोधित करत मड़वा म आपसी सहयोग ले धर्मशाला निर्माण बर सतनामी समाज ल बधाई दीन। उमन कहिन कि गिरौदपुरी धाम म देश-विदेश के मनखे गुरु बाबा के दर्शन करे आथें। फेर ऊंखर रूके के व्यवस्था नइ रहिस। सर्व-सुविधायुक्त धर्मशाला के निर्माण ले अब रूके बर अच्छा सुविधा उपलब्ध होही। मुख्यमंत्री ह कहिन कि गिरौदपुरी धाम न केवल सतनामी बल्कि सबो समाज के मनखे मन के आस्था के प्रमुख केंद्र हे। गुरू बाबा के मनखे-मनखे एक समान के संदेश आज जादा प्रासंगिक हे। गिरौदपुरी के आस-पास सोनाखान, शिवरीनारायण, सिरपुर अऊ तुरतुरिया स्थित हे। ए सबो ल जोड़त एक टूरिस्ट सर्किट के तौर म विकसित करे जाही।