– पर्यावरन ल बचाये ले पर्यावरन हमला बंचाथे, बताईन गोवर्धन पर्वत के बात
दुर्ग, जिला के महकाखुर्द गांव म कोसरिया यादव महासभा के कार्यक्रम म पहुंचे मुख्यमंत्री श्री भूपेश बघेल ह कहिन के द्वापर जुग म गोपी मन अपन दूध दही मथुरा भेज देत रहिन, स्थानीय ग्वाल लइका कुपोषित रहि जात रहिन, कृष्ण जी ह माखन चोरी करके एकर प्रतिरोध करिन। एखर से हमला का शिक्षा मिलथे। अपन लइका मन ल बनेच दूध दही देवव ताकि उमन ल मानसिक अऊ शारीरिक पोषण मिल सकय।
उमन कहिन कि प्रदेश म अभी तक 37 प्रतिशत लइका कुपोषित हे 41 प्रतिशत महिला मन ल एनीमिया हे। अइसन म पोषण आहार के कतका महत्व हे, तउन ल समझव। नरवा, गरुवा, घुरूवा, बाड़ी योजना के माध्यम ले पशुधन संवर्धन म एखरे सेती जोर देहे जात हे ताकि पशु मन ल गुणवत्तापूर्ण अउ प्रचुर मात्रा म चारा मिल सकय। गौठान समिति मन के संचालन बर दस हजार रूपिया देहे गे हे। मुख्यमंत्री ह कहिन कि अपन पशुधन के संवर्धन बर हम सब संकल्प लेवन अऊ गौठान ल मजबूत करे म भागीदारी निभावन। एखर से प्रदेश म दूध के नदिया बोहाही।
