- मुख्यमंत्री ह किसान मन अऊ नागरिक मन ले करिन आव्हान
- प्रदेश सरकार हर हाल म किसान मन ले 25 सौ रूपिया कुंटल म बिसाही धान – श्री बघेल ह दोहराइस संकल्प
- मुख्यमंत्री राजीव गांधी आश्रय योजना पट्टा वितरण, विकास काम मन के लोकार्पण अऊ भूमिपूजन समारोह म होइन सामिल
- राजनांदगांव म 137 करोड़ रूपिया के विकास काम मन के होइस लोकार्पण अऊ भूमिपूजन
रायपुर, मुख्यमंत्री श्री भूपेश बघेल आज राजनांदगांव के स्टेट हाईस्कूल मैदान म आयोजित राजीव गांधी आश्रय योजना पट्टा वितरण, विकास काम मन के लोकार्पण अऊ भूमिपूजन समारोह म प्रदेश के किसान मन अऊ नागरिक मन ले आव्हान करिन कि पड़ोसी राज्य मन ले अवइया धान ल छत्तीसगढ़ म खपाए ले रोकव, ये काम म शासन-प्रशासन ल सहयोग करव। मुख्यमंत्री ह कार्यक्रम म 137 करोड़ 20 लाख रूपिया के विकास काम मन के लोकार्पण अऊ भूमिपूजन करिन। एमां 54 करोड़ 27 लाख रूपिया के विकास काम मन के लोकार्पण अऊ 82 करोड़ 74 लाख रूपिया के विकास काम मन के भूमिपूजन सामिल हे। मुख्यमंत्री ह जिला म राजीव गांधी आश्रय योजना के तहत पट्टा वितरण के शुभारंभ करिन। उमन घर पहुंच पेंशन मितान योजना के घलोक शुभारंभ करिन।
कार्यक्रम के शुरूआत राज्यगीत ‘‘अरपा पैरी के धार – महानदी हे अपार’’ ले होइस। समारोह म उपस्थित सबो अतिथि मन अऊ आम नागरिक मन ह अपन जगह म खड़े होके राज्यगीत के सम्मान करिन। मुख्यमंत्री संग सबो अतिथि मन ह दिया बार के समारोह के शुभारंभ करिन। श्री बघेल ह समारोह स्थल म लगे जिला के नगरीय निकाय मन के स्टॉल म जाके राजीव गांधी आश्रय योजना के पट्टेधारी मनखे मन ले चर्चा घलोक करिन।
मुख्यमंत्री श्री भूपेश बघेल ह आम सभा ल संबोधित करत कहिन कि प्रदेश सरकार अपन वायदा पूरा करही अऊ हर हाल म किसान मन के धान 2500 रूपिया प्रति क्विंटल के दर ले ही बिसाही। छत्तीसगढ़ के जनता के आशीर्वाद अऊ सहयोग ले हमर सरकार अनाज के अपमान नइ होए दए। मुख्यमंत्री ह कहिन कि किसान मन ल धान के भरपूर कीमत मिले के सेती छत्तीसगढ़ म मंदी के स्थिति नइ हे। श्री बघेल ह कहिन कि केन्द्र सरकार ले केन्द्रीय पुल के चावल लेहे बर हमर कोसिस लगातार जारी हे। छत्तीसगढ़ के जनता ह हमर सरकार ल आशीर्वाद दे हे। जनता के हक के अवाज दिल्ली तक जरूर पहुंचही। श्री बघेल ह कहिन कि ये साल खरीफ मौसम म 85 लाख मीटरिक टन धान खरीदे के लक्ष्य रखे गए हे।
छत्तीसगढ़ म गरीब, किसान, मजदूर, महिला, युवा सबके विकास बर योजना बनाके क्रियान्वयन करे जात हे। मनखे मन के स्वास्थ्य के चिंता करत डॉ. खूबचंद बघेल स्वास्थ्य सहायता योजना के तहत 5 लाख रूपिया तक के इलाज के सुविधा दिए जाही। बड़े बीमारी मन म 20 लाख रूपिया तक के सहायता देहे के योजना बनाए गए हे। देश म छत्तीसगढ़ एक मात्र अइसन राज्य हे जऊन अतका बड़ राशि इलाज बर देहे के फैसला लेहे हे।
श्री बघेल ह कहिन कि मुख्यमंत्री सुपोषण अभियान के तहत कुपोषित लइका मन ल सुपोषित बनाए बर योजना शुरू करे गए हे। अइसन लइका मन ल अकतहा पोषण आहार देहे जात हे। प्रदेश के 41 प्रतिशत ले जादा महिला मन एनीमिया ले पीड़ित हे। ए महिला मन ल घलोक पोषण आहार देहे जात हे। मुख्यमंत्री हॉट बाजार क्लीनिक योजना ले दूरस्थ अंचल के मनखे मन ल इलाज के सुविधा मिलत हे। शहरी गरीब मन बर मुख्यमंत्री स्लम स्वास्थ्य योजना चलत हे। श्री बघेल ह कहिन छत्तीसगढ़ के चार चिन्हारी – नरवा, गरवा, घुरवा अऊ बारी योजना ले एक कोति जिहां ग्रामीण अर्थ व्यवस्था मजबूत होही उन्हें दुसर कोति आज के जरूरत के जइसे जैविक खेती ल बढ़ावा मिलही।
श्री बघेल ह मनखे मन ले खरीफ धान के पैरा ल वर्मीकम्पोस्ट बनाए बर उपयोग करे के आग्रह करत कहिन कि पैरा ल जलाए ले पर्यावरण ल नुकसान पहुंचही। श्री बघेल ह गोठान योजना के चर्चा करत कहिन कि ये योजना के क्रियान्वयन बर सबके सहयोग चाही। श्री बघेल ह कहिन कि छत्तीसगढ़ के संपदा के उपयोग जनता के हित म करे जाही। उमन मनखे मन ले शासकीय योजना मन के लाभ लेहे के घलोक आग्रह करिन। श्री बघेल ह कहिन कि गरवा योजना के तहत विकसित करे जात गौठान मन म घलोक किसान मन ल पैरा दान करना चाही।
समारोह के अध्यक्षता करत श्री मोहम्मद अकबर ह कहिन कि प्रदेश सरकार ह किसान मन के कर्जा माफ, 2500 रूपिया प्रति क्विंटल म धान खरीदी, बिजली बिल हाफ, बोनस वितरण, तेन्दूपत्ता संग्रहण दर म वृद्धि जइसे वादा पूरा करे हे। श्री अकबर ह कहिन कि छत्तीसगढ़ देश के अइसन पहला राज्य हे। जिहां के 65 लाख परिवार मन ल राशन कार्ड के दायरा म लाए गए हे।
कृषि मंत्री श्री रविन्द्र चौबे ह कहिन कि छत्तीसगढ़ राज्य बने 19 साल पूरा हो गे, फेर अब मुख्यमंत्री श्री भूपेश बघेल के सरकार आए के बाद पहली पइत छत्तीसगढिया मनखे मन ल लागत हे कि ये उंखर राज्य हे। मुख्यमंत्री श्री बघेल के नेतृत्व म छत्तीसगढ़ के कला-संस्कृति, खान-पान, रहन-सहन ल एक नवा सम्मान मिले हे। मुख्यमंत्री के सोच हे कि कोनो गरीब आदमी बेघर झन रहय ते खातिर राजीव आश्रय योजना के तहत शहरी क्षेत्र मन म पट्टा देहे जात हे। गढ़बो नवा छत्तीसगढ़ के रद्दा म चलके छत्तीसगढ़ के विकास करना हे।
नगरीय प्रशासन मंत्री डॉ. शिव डहरिया ह कहिन कि राजीव गांधी आश्रय योजना के तहत 19 नवम्बर 2018 ले पहिली सार्वजनिक या नजूल के जगा म काबिज शहरी गरीब मन ल पट्टा दिए जात हे। उमन बताइन कि मोर जमीन-मोर मकान योजना के तहत शहरी क्षेत्र मन के गरीब मन के कच्चा मकान ल पक्का बनाए बर आर्थिक सहायता दिए जात हे। मोर मकान-मोर चिन्हारी योजना के तहत शहर मन म सार्वजनिक जगा मन म बसे मनखे मन ल बसाहट दिए जाही।
समारोह म विधायक सर्वश्री दलेश्वर साहू, श्री इन्द्रशाह मंडावी, श्रीमती छन्नी साहू, श्री भुनेश्वर बघेल, श्री देवव्रत सिंह, जिला पंचायत राजनांदगांव के अध्यक्ष श्रीमती चित्रलेखा वर्मा, नगर निगम राजनांदगांव के महापौर श्री मधुसूदन यादव, राज्य अल्प संख्यक आयोग के सदस्य श्री हफीज खान, पूर्व सांसद श्रीमती करूणा शुक्ला संग बड़ संख्या म नागरिक उपस्थित रहिन।
