रायपुर 20 फरवरी 2023 मुख्यमंत्री दाऊ भूपेश बघेल ह आज अपन घरू कार्यालय म होवइया आभासी कार्यक्रम छत्तीसगढ़ स्वामी विवेकानंद तकनीकी विश्वविद्यालय भिलाई के ई-लाइब्रेरी के उद्घाटन करीन। ई -लाइब्रेरी के माध्यम ले जम्मो तैंतीस जिला के फार्मेसी, डिप्लोमा, इंजीनियरिंग अउ प्रबंधन संस्थान मन म पढ़त 27000 छात्र छात्रा मन ल उन्कर मोबाइल अउ लेपटॉप म आनलाईन पुस्तक के सुविधा उपलब्ध हो जही।
दाऊ भूपेश बघेल ह छत्तीसगढ़ स्वामी विवेकानंद तकनीकी विश्वविद्यालय के जम्मो दल ये सुविधा खातिर नवा उदीम बर बधई अउ शुभकामना दीन। दाऊ भूपेश बघेल ह कहिन कि कोरोना महामारी के सेति पढ़ई पढ़वई के बूता ह अबड़े प्रभावित होए रिहिस हावय जेकर ले दुनिया भर म पढ़ई पढ़वई के बूता एक ठिन चुनौती बनगे रिहिस हवय। अइसन बेरा म आनलाईन पढ़ई तो शुरू होइस, फेर पुस्तक उपलब्ध नइ रिहिस हावय काबर कि जम्मो शैक्षणिक संस्था वो पइत बंद रिहिस हावय।
दाऊ भूपेश बघेल ह कहिन कि भविष्य म अइसन कठिनाई दुसरइया झन होवय तेकर बर छत्तीसगढ़ स्वामी विवेकानंद तकनीकी विश्वविद्यालय भिलाई ह ई-लाइब्रेरी के माध्यम ले बने बूता करे हावय। ई लाइब्रेरी ले अवइया 7 बछर तक पुस्तक ह पढ़इया मन के मोबाइल अउ लैपटाप म उपलब्ध रहिही। विश्वविद्यालय के उदीम ह राज्य के पढ़इया मन के पढ़ई म सहायक होही।
दाऊ भूपेश बघेल ह कहिन कि पढ़इया मन ये सुविधा के लाभ उठावय अउ सस्थान के संगे संग प्रदेश के नाम ल देश विदेश म बगरावय
