रइपुर, 9 मई 2021 इतवार। मुख्यमंत्री दाउ भूपेश बघेल ह कोविड-19 महामारी ले बचाव खातिर टीकाकरण बर बड़का घोषणा करीन हे कि राज्य के पत्रकार,वकील अउ उन्कर परिजन मन ल तको फ्रंट लाईन वर्कर मन बरोबर टीकाकरण करे म प्राथमिकता देहे जाहीं।
जानबा होवय कि मुख्यमंत्री दाउ भूपेश बघेल ह पहिलीच निर्देश देहे रिहिने कि फेर ये मामला न्यायलयीन होए के सेति अटके रिहिसे। ये संबंध म मुख्य सचिव के अध्यक्षता म बने सचिव मन के समिति के अनुशंसा म राज्य सरकार कोति ले फ्रंट लाईन वर्कर के सूची म श्रेणी म स्वास्थ्य विभाग ले परिभाषित कोमार्बिडिटी वाले मनखे, भोजन देवइया अउ सब्जी विक्रेता, बस ड्राइवर कंडक्टर, आंगनबाड़ी कार्यकर्ता, मितानिन, पंचायत सचिव/कर्मी, पीडीएस दुकान प्रबंधक अउ विक्रेता, इंसटिटुशनल केयर म रहइया माइलोगन, गांव के कोटवार अउ पटेल, राज्य सरकार के करमचारी, राज्य पब्लिक सेक्टर अंडरटेकिंग के कर्मचारी अउ इन्कर इमिडियेट परिजन मन ल संघारे हवय।
ओइसने वृद्धाश्रम म, महिला देखभाल केन्द्र अउ बाल देखभाल म बूता करइया मनखे, शमशान, कब्रिस्तान म बूता करइया मनखे, दिव्यांग मनखे, आवश्यक सेवा देवइया अर्धशासकीय संस्था जइसे- प्राथमिक कृषि सहकारी समिति, मार्कफेड, सहकारी बैंक म काम करत करमचारी, कलेक्टर कोति ले कोरोना ड्यूटी म लगाए मनखे, राज्य शासन कोति ले परिभाषित कोनो आने श्रेणी के मनखे ल तको संघारे गे हवय।
स्वास्थ्य विभाग कोति ले फ्रंट लाईन वर्कर के पहिचान के संबंध म विस्तृत मार्गदर्शी सिद्धांत जारी करे जाही। कहूं फ्रंटलाइन वर्कर श्रेणी के कोनो मनखे एपीएल के छोड़ आने कोनो राशनकार्ड लाथे त ओला तको राशनकार्ड के श्रेणी म माने जाही। राशनकार्ड नइ लाही त ओला फ्रंट लाईन वर्कर के श्रेणी म माने जाही । जेल म रहइया बंदी मन ल तको टीकाकरण म उही प्राथमिकता देहे जाय जउन फ्रंटलाइन वर्कर ल देहे जाही काबर के वो अपन सुरक्षा नइ कर सकयं। अइसने वकील, पत्रकार अउ उन्कर इमिडियेट परिजन मन ल तको फ्रंटलाईन वर्कर के बरोबर टीकाकरण म प्राथमिकता देहे जाही ।