मुख्यमंत्री के घोषणा के तुरते ताही अमल : कमला नेहरू प्री.मैट्रिक आदिवासी कन्या छात्रावास ज्योतिपुर आज ले खुलगे

रइपुर, 02 सितंबर 2021 बिरस्पत। मुख्यमंत्री दाउ भूपेश बघेल ह 01 सितम्बर के गौरेला-पेण्ड्रा-मरवाही जिला के ग्राम तवाडबरा के प्रवास के बेरा एक झिन बैगा आदिवासी स्कूली छात्रा सरस्वती के आग्रह करे म जिला म आश्रम-छात्रावास प्रारंभ करे के घोषणा म विभाग कोति ले तुरते ताही अमल करे गईस। सरस्वती बैगा ह गौरेला के ज्योतिपुर स्थित कमला नेहरू प्री.मैट्रिक आदिवासी कन्या छात्रावास प्रारंभ कराए के आग्रह मुख्यमंत्री ले करे रिहिसे। ये छात्रावास आज 02 सितम्बर ले प्रारंभ होगे। छात्रावास के छात्रा मन ह मुख्यमंत्री दाउ बघेल ल एकर बर धन्यवाद दीन।
छात्रावास बंद होए ले दूरिहा के गांव के लइका मन बर अपन घर ले अंताजन 20-25 किलोमीटर दूरिहा स्थित स्कूल जाना संभव नहीं हो पावत रिहिसे। मुख्यमंत्री दाउ बघेल के संवदेनशील फैसला ले अब बैगा आदिवासी स्कूली छात्रा सरस्वती बैगा संग अउ पढ़इया मन के समस्या के समाधान होगे।