रायपुर, 01 फरवरी 2021। देश अऊ प्रदेश के प्रगति म महती भागीदारी निभइया युवा मन के सेहत ल बेहतर करे बर प्रोत्साहित करत मुख्यमंत्री श्री भूपेश बघेल ह कहिन कि स्वस्थ शरीर म ही बने अऊ सकारात्मक विचार के वास होथे। जेखर से इंसान अपन दिनचर्या के संगेच पूरा जीवन के भरपूर आनंद ले सकत हे। उमन सफल दिनचर्या बर रोजेच व्यायाम अऊ योग ल महत्वपूर्ण बताइन। श्री बघेल ह वनांचल आदिवासी क्षेत्र सुकमा के स्वामी विवेकानंद परिसर म आज फिटनेस सेंटर के अवलोकन के समय जिम म खुदे कसरत करके युवा मन ल प्रेरित करिन। ये बेरा म उद्योग मंत्री श्री कवासी लखमा, राजस्व मंत्री श्री जयसिंह अग्रवाल, सांसद बस्तर श्री दीपक बैज संग विधायक श्री मोहन मरकाम घलोक उपस्थित रहिन।
जानबा हे के स्वामी विवेकानंद परिसर म 11 लाख के लागत ले निर्मित सर्व सुविधा सहित फिटनेस सेंटर म ट्रेडमिल, साइकिलिंग, मल्टीजिम, ट्राइसेप मशीन, लेग प्रेस, बेंच प्रेस आदि उपकरण उपलब्ध हे। फिटनेस सेंटर म रोजाना वर्जिश बर अवइया युवा अभिषेक शर्मा ह बताइस कि सुकमा म सर्व सुविधा सहित जिम के संचालन ले ओ मन बहुत खुश हे। ओ ह खुद ल तंदुरुस्त बनाए रखे बर रोजाना संझा ल फिटनेस सेंटर आथे। वोला फिटनेस सेंटर म उपलब्ध कई ठन उपकरण मन के संगेच कुशल प्रशिक्षक मन के सहयोग मिले ले कसरत करे म बहुत आनंद आथे।
मुख्यमंत्री ह कसरत करके युवा मन ल दीन फिटनेस मंत्र : स्वस्थ तन अऊ सकारात्मक मन बर व्यायाम जरूरी: मुख्यमंत्री श्री भूपेश बघेल
