नरवा संवर्धन हमर अल्ली प्राथमिकता – मुख्यमंत्री दाऊ बघेल
गौरेला-पेण्ड्रा-मरवाही प्राकृतिक संसाधन ले भरे जिला: पर्यटन के संभावना अधिक
मुख्यमंत्री ह समीक्षा बइठकक म दीन हुकुम
रइपुर, 05 जुलाई 2022
मुख्यमंत्री दाऊ भूपेश बघेल ह कहीन कि सुराजी गांव योजना म नरवा संवर्धन ल पहली प्राथमिकता म रखे गे हवय। नरवा संवर्धन ले वाटर रिचार्ज होही अउ भू-जल स्रोत पुनर्जीवित होही। स्थानीय लोगन मन के निस्तारी के समस्या के समाधान होही, संग म सिंचित रकबा तको बाढ़ही। सिंचई रकबा बढ़ाए अउ निस्तारी पानी के बेवस्था बर सोलर सिस्टम ल बढ़ावा देहे जावय। मुख्यमंत्री ये बात आज गौरेला-पेण्ड्रा-मरवाही जिला के ग्राम गौरेला म होवइया जिला अधिकारी मन के समीक्षा बइठका मन कहीन।
मुख्यमंत्री ह अधिकारी मन कहीन कि मनरेगा के तहत कुआं बनावयं। येकर ले निस्तारी अउ सिंचाई बर पानी रहिही अउ गांव म रोजगार मिलही। सबो पंचायत मन गौठान बनत हे येमन ल रूरल इंडस्ट्रीज पार्क के रूप म विकसित करे जाही। जिहां लाख, वन औषधि सहित अउ आने स्थानीय उत्पाद मन के प्रसंस्करण होही।
मुख्यमंत्री ह अधिकारी मन ले येहू कहीन कि आम जनता के आय बढ़ाए बर कार्ययोजना बनाके राज्य सरकार ल प्रस्ताव भेजें।
मुख्यमंत्री कहीन कि अनुसूचित जाति, अनुसूचित जनजाति अउ आने पिछड़ा वर्ग ले संबंधित विद्यार्थी मन के अधिक से अधिक संख्या म जाति प्रमाण पत्र स्कूलेच ले जारी करे जावय।
विशेष रूप ले 9वीं अउ 10वीं कक्षा के लइका मन के जाति प्रमाण पत्र अवश्य बनावयं।
राजस्व प्रकरण मन के प्राथमिकता के साथ समय म निराकरण करयं। अविवादित नामांतरण, बंटवारा के निस्तारण म निश्चित प्रक्रिया के पालन करत भुइयां पोर्टल म दर्ज अवश्य करंय। 170 के राजस्व प्रकरण मन के लउहे निराकरण करयं। येकर ले राजस्व रिकॉर्ड अपडेट रहिही अउ भूमि संबंधी झगरा म कमी आही।
गौरेला-पेण्ड्रा-मरवाही प्राकृतिक संसाधन ले भरे जिला हरय। इहां आने जिला मन के तुलना म पर्यटन के संभावना अधिक हवय, उन मन राजमेरगढ़ ल पर्यटन स्थल के रूप म विकसित करे खातिर कार्ययोजना तियार करे के निर्देश कलेेक्टर ल दीन। मुख्यमंत्री ह वनाधिकार पट्टा, बिजली कटौती के संगे-संग अउ आने स्थानीय समस्या मन के निराकरण बर तको अधिकारी मन ल निर्देशित करीन। बइठका म विधायक डॉ. के.के. ध्रुव, अतिरिक्त मुख्य सचिव श्री सुब्रत साहू, सचिव ऊर्जा श्री अंकित आनंद संग अबड़ अकन विभाग के जिला स्तरीय अधिकारी मन उपस्थित रिहिन।
