रइपुर 24 अप्रैल 2021 शनिच्चर। मुख्यमंत्री दाउ भूपेश बघेल ह प्रधानमंत्री श्री नरेन्द्र मोदी ल चिट्ठी लिखके रइपुर के स्वामी विवेकानंद एयरपोर्ट ल अंतर्राष्ट्रीय एयरपोर्ट के रूप म अपग्रेड करे के अनुरोध करे हवय । पाती ल लिखे हे कि कोविड महामारी के सेति वैश्विक आर्थिक मंदी के बेरा म तको छत्तीसगढ़ देश के सबले तेजी ले बाढ़त राज्य मन म हावय। औद्योगिक मोर्चा म राज्य के समृद्ध खनिज संसाधन मन उपर आधारित लोहा, इस्पात, सीमेंट, विद्युत अउ आने आने कोर क्षेत्र मन म पोठलगहा प्रदर्शन के पीछू छत्तीसगढ़ विकास कोति जादा बने संभावना मन बर तियार हवय।
रइपुर म स्वामी विवेकानंद एयरपोर्ट के 2012 म नवा टर्मिनल के कमीशनिंग के थोरके बछर पाछू स्वामी विवेकानंद एयरपोर्ट ल दू पइत ले गैर–मेट्रो श्रेणी म सर्वश्रेष्ठ हवाई अड्डा के रूप म मान्यता प्रदान करे गे हवय। हमन ल पक्का़ विश्वास हवय कि रायपुर के स्वामी विवेकानंद एयरपोर्ट ल अंतर्राष्ट्रीय एयरपोर्ट के रूप म अपग्रेड करे अउ कार्गो हब के उपलब्धता ले राज्य के विकास के क्षमता ल अउ बने मजबूती मिलही। संगे –संग एकर ले छत्तीसगढ़ राज्य ल देश के केंद्रस्थल म स्थित होए के तको बने लाभ मिल सकही ।
रोजगार के अवसर उत्पन्न होए ले छत्तीसगढ़ के अर्थव्यवस्था के विकास ल गति मिलही। राज्य अउ जिलास्तरीय निर्यात संवर्धन समिति मन पहिलीच ले क्रियाशील होगे हवय ।
प्रशासनिक मशीनरी ह तको ए क्षमता के उपयोग करे बर अपन तियारी पूरा कर लेहे हवय ।
राज्य सरकार कोति ले एयरपोर्ट अथॉरिटी ऑफ इंडिया ल 344 एकड़ भूइयां अंतरराष्ट्रीय मानक खातिर रनवे के विस्तार करे बर प्रदान करे गे हवय । रनवे के लंबाई 7500 फीट तक बढ़ा देहे गे हे । राज्य सरकार जुन्ना टर्मिनल ल कार्गो हैंडलिंग फैसिलिटी के रूपांतरण म होवइया खरचा ल उठाए बर तियार हें। स्वामी विवेकानंद हवाई अड्डा ल अंतरराष्ट्रीय एयरपोर्ट घोषित करई ह महान संत श्री विवेकानंद जी ल एक श्रद्धांजलि होही।
