रायपुर, 04 जून 2021 शुकवार। मुख्यमंत्री दाउ भूपेश बघेल ह प्रदेशवासी मन ल विश्व पर्यावरण दिवस के अवसर म हार्दिक बधई अउ शुभकामना दीन हे। उन मन अपन शुभकामना संदेश म कहीन कि पर्यावरण असंतुलन के सेति एक कोति जिहां प्रदूषण बाढ़त हे,उहेंचे ग्लोबल वार्मिंग, वर्षा के अनियमित होना, एसिड रैन जइसन कई ठन समस्या मन हमार जिनगी ल प्रभावित करे लगे हे। जिनगी के अस्तित्व बचाए बर हमन ल अभीन ले पर्यावरण संरक्षण कोति धियान देना होही नईतो भविष्य के पीढ़ी बर खुल्ला हवा म सांस लेना तको कठिन हो जाही।
मुख्यमंत्री कहीन कि विश्व पर्यावरण दिवस मनखे अउ प्रकृति के बीच सामंजस्य ल अउ गहिरी करे बर प्रेरित करथे। ये ब्रछर साल विश्व पर्यावरण दिवस के थीम पारिस्थितिकी तंत्र के पुनर्बहाली उपर आधारित हवय। कोरोना संक्रमण ले बचाव बर संसार भर म लॉकडाउन के एक सकारात्मक पक्ष आगू आइस हे। प्रदूषण म गिरावट दर्ज करे गईस अउ जीव-जन्तु प्रकृति के आनंद लेवत देखउ दीन। ये सोनहा बेरा हवय कि हम अपन काम मन के आत्मचिंतन अउ आंकलन करन अउ पर्यावरण अनुकूल वातावरण बनाए म सहयोग देंवन।
छत्तीसगढ़ म ‘‘मुख्यमंत्री वृक्षारोपण प्रोत्साहन योजना‘‘ शुरू होवइया हे। एकर अंतर्गत जउन किसान मन खरीफ बछर 2020 म धान के फसल लेथे, वोह धान के बलदा अपन खेत म वृक्षारोपण करही, त ओला अवइया 3 साल तक हरेक साल 10 हजार रूपिया प्रति एकड़ के दर ले प्रोत्साहन राशि देहे जाही। अइसने ग्राम पंचायत के उपलब्ध राशि ले वाणिज्यिक वृक्षारोपण करे जाही, त एक बछर बाद सफल वृक्षारोपण के दशा म संबंधित ग्राम पंचायत मन ल शासन कोति ले 10 हजार रूपिया प्रति एकड़ के दर ले प्रोत्साहन राशि देहे जाही। एकर छोड़ संयुक्त वन प्रबंधन समिति मन तीर उपलब्ध राशि ले कहूं वाणिज्यिक अधार म राजस्व भूमि म वृक्षारोपण करे जाथे, त पंचायते सहीन संबंधित समिति ल एक बछर बाद 10 हजार रूपिया प्रति एकड़ के दर ले प्रोत्साहन राशि देहे जाही।
मुख्यमंत्री दाउ बघेल कहीन कि हमन ल अपन तीर—तखार म अधिक से अधिक वृक्षारोपण करे बर लोगन ल जागरूक करना चाही। अपन भावी पीढ़ी के बने भविष्य बर पर्यावरण ल बचाए के संकल्प लेना चाही जेकर ले हम प्रदूषण रहित स्वस्थ छत्तीसगढ़ अउ स्वस्थ भारत के निर्माण म योगदान दे सकन।
