- राज्य सरकार ह 1000 एकड़ जमीन रक्षा मंत्रालय ल थल सेना छावनी के स्थापना बर करे हे आबंटित
- बिलासाबाई केवटींन हवाई अड्डा अब सिविल एविएशन अऊ थल सेना के विमानन संबंधित जरूरत मन ल पूरा करे बर उपलब्ध
- राज्य म आर्मी छावनी के स्थापना ले इलाका के समुचित विकास के संग राज्य के युवा मन ल सेना म सहजता ले उपलब्ध होही अवसर
- थल सेना छावनी के नक्सलवादी उग्रवाद के उन्मूलन के दिशा म होही सहायक
रायपुर, 20 फरवरी 2021। मुख्यमंत्री श्री भूपेश बघेल ह केन्द्रीय रक्षा मंत्री श्री राजनाथ सिंह ल चिट्ठी लिखके बिलासपुर म थल सेना के लंबित छावनी के लऊहे स्थापना करे के अनुरोध करे हें। मुख्यमंत्री ह केन्द्रीय रक्षा मंत्री के ध्यान राज्य के विकास के दिशा म राज्य म सैन्य संस्थान मन के विकास के प्रयास कोति आकर्षित करत लिखे हें के- राज्य ह करीबन 1000 एकड़ जमीन रक्षा मंत्रालय ल बिलासपुर म थल सेना छावनी के स्थापना बर आबंटित करे हे। तेमा थल सेना छावनी के स्थापना के प्रक्रिया लंबित हे।
सुरू म थल सेना छावनी के स्थापना बर हवाई पट्टी के जरूरत बताए गए रहिस। राज्य सरकार ह ये इलाका के विमानन जरूरत मन ल धियान म रखत ये हवाई पट्टी के विस्तार कराके जरूरी प्रक्रिया पूरा कर लेहे हे। बिलासाबाई केवटींन हवाईअड्डा बिलासपुर अब डीजीसीए कोति ले 3सी वीएफआर कैटगरी म मान्यता पा गए हे । अब ये हवाई पट्टी सिविल एविएशन अऊ थल सेना के विमानन संबंधित जरूरत मन ल पूरा करे बर उपलब्ध हे।
मुख्यमंत्री ह लिखे हें के अवईया एक मार्च ले बिलासपुर ले व्यवसायिक यात्री सेवा तको सुरू होवत हे। राज्य सरकार चक्रभाठा, बिलासपुर म थल सेना छावनी के स्थापना बर उत्सुक हे। राज्य म आर्मी छावनी के स्थापना ले न केवल ये इलाका के समुचित विकास म गति आही भलुक थल सेना सेवा के अवसर राज्य के युवा मन ल सहजता ले उपलब्ध घलोक होही। थल सेना छावनी के राज्य म उपस्थिति ले मूलतः नक्सलवादी उग्रवाद के उन्मूलन के दिशा म सहायक होए के घलोक आशा हे।
श्री बघेल ह कहे हें के थल सेना छावनी के स्थापना ले राज्य सरकार अऊ केन्द्र सरकार ल होवइया लाभ मन ल धियान म रखत, राज्य सरकार रक्षा मंत्रालय ले एखर स्थापना लऊहे करे बर आग्रह करना चाहथे। ये दिशा म राज्य सरकार रक्षा मंत्रालय अऊ थल सेना के आन संबंधित जरूरत मन म घलोक विचार करे बर तियार हे। ये संदर्भ म रक्षा मंत्रालय के संग काम करे बर राज्य सरकार तत्पर हे अऊ मैं आपसे सहयोग के आशा करत हंव।
