रायपुर, मुख्यमंत्री श्री भूपेश बघेल ह आज संझा राजधानी रायपुर के वीआईपी रोड़ स्थित राजीव स्मृति वन म विश्व पर्यावरण दिवस म पीपल के करीबन 12 फीट लम्बा पौधा लगाइस। ए अवसर म राज्यसभा सांसद श्रीमती छाया वर्मा, पूर्व सांसद श्रीमती करुणा शुक्ला अऊ रायपुर नगर निगम के पूर्व महापौर डॉ. किरणमयी नायक संग बहुत अकन जनप्रतिनिधि, वन विभाग के प्रधान मुख्य वन संरक्षक श्री राकेश चतुर्वेदी अउ बहुत अकन अधिकारी उपस्थित रहिन।
मुख्यमंत्री ह ए अवसर म नागरिक मन ले अपील करत कहिन के आज पर्यावरण बर काम करे के जरूरत हे। छत्तीसगढ़ म 44 प्रतिशत वन क्षेत्र हे, फेर कई जगा म बिगड़े वन हे। जिहां वृक्षारोपण करना चाही। एखरे संगे संग आबादी अऊ शहरी क्षेत्र मन अउ औद्योगिक क्षेत्र मन म पर्यावरण संतुलन बर बड़का पैमाना म वृक्ष लगाय के जरूरत हे, जेखर से वायु प्रदूषण म कमी आही।
प्रधान मुख्य वन संरक्षक श्री चतुर्वेदी ह मुख्यमंत्री ल बताइस कि साल 2001 के फरवरी महिना म राजीव स्मृति वन के काम शुरू होय रहिस। एक नवम्बर 2001 म सांसद श्रीमती सोनिया गांधी ह बर के पौधा रोपके स्मृति वन के शुभारंभ करे रहिन। पहिली इहां केवल बबूल के पेड़ रहिस। करीबन 64 एकड़ के रकबा म विकसित राजीव स्मृति वन म अभी हाल म करीबन 9 हजार वृक्ष लगे हे। इहां मनखे अपन परिजन मन के स्मृति म घलोक वृक्ष लगाथें। श्री चतुर्वेदी ह ये जानकारी घलोक दीन के ए साल बारिश शुरू होए के बाद प्रदेश भर म शासकीय अऊ निजी जमीन म करीबन सात करोड़ पौधा रोपे जाही।