जनकल्याणकारी योजना मन ले बदलत हे जिनगी: मुख्यमंत्री ह हितग्राही मन ला सामान बांटिन
कोरिया, मुख्यमंत्री श्री विष्णु देव साय ह आज कोरिया प्रवास के बखत कोरिया महोत्सव के सुरूआत म अलग-अलग जनकल्याणकारी योजना मन के तहत हितग्राही मन ला ओमन के काम के सामान बाँट के लाभ पहुँचाईन।
मुख्यमंत्री श्री साय ह कार्यक्रम म 105 पात्र हितग्राही मन ला प्रधानमंत्री उज्ज्वला योजना के तहत गैस कनेक्शन दीन। ओमन कहिन के ए योजना ले अब ए परिवार मन ला धुँआ ले मुगति मिले के संगे-संग सुरक्षित, सफ़ा अउ सेहत बर बने ईंधन के सुबिधा मिलही, जेकर ले माईलोगन मन के जिनगी म बढ़िया बदलाव आही।
ए मउका म सुग्घर रोजगार अउ महिला सशक्तिकरण ला बढ़ावा देय के उदेस ले 6 आजीविका दीदी मन ला पिंक ई-रिक्शा (ग्रामीण आजीविका एक्सप्रेस) देहे गीस। मुख्यमंत्री ह कहिन के ए पहल ह माईलोगन मन के आय बढ़ाय के संग ओमन ला आत्मनिर्भर बनाय कोति एक बड़का कदम आय अउ एकर ले ग्रामीण अरथवेवस्था ला घलो नवा गती मिलही।
मुख्यमंत्री श्री साय ह जिला के सफ़ाई बेवस्था ला अउ मजबूत करे बर 14 स्वच्छता दीदी मन ला गार्बेज रिक्शा घलो बाँटिन। ओमन कहिन के सफ़ाई ह सिरिफ एक बेवस्था नोहे बल्कि जनभागीदारी के एक अभियान आय, अउ ए दिसा म माईलोगन मन के भागीदारी सराहे के लइक हे।
मुख्यमंत्री ह कहिन के राज्य सरकार के लछ्य हे के योजना मन के लाभ आखिरी मनखे तक पहुँचय, ताकि समाज के हर वर्ग विकास के मुख्यधारा ले जुड़ सकंय। ओमन कहिन के सरकार जनकल्याण अउ आत्मनिर्भरता के संकलप के संग सरलग काम करत हे।