सरगुजा क्षेत्र आदिवासी विकास प्राधिकरण के बैठक म विकास काम के समीक्षा: वित्तीय बछर 2025-26 बर 50 करोड़ रुपया के बजट प्रावधान ला मंजूरी, 543 विकास काम मन ला मिलिस स्वीकृति
बैकुंठपुर, मुख्यमंत्री श्री विष्णु देव साय के अध्यक्षता म आज कोरिया जिला के बैकुंठपुर म आयोजित सरगुजा क्षेत्र आदिवासी विकास प्राधिकरण के बैठक म सरगुजा संभाग के जिला मन म चलत विकास काम मन के प्रगति के समीक्षा करे गीस अउ जनप्रतिनिधि मन के सुझाव के आधार म नवा योजना मन ला मंजूरी देहे गीस।
मुख्यमंत्री श्री साय ह कहिन के राज्य सरकार ह सरगुजा अउ बस्तर क्षेत्र के विकास ला प्राथमिकता म रखे हे। प्राधिकरण के माध्यम ले पिछड़े अउ वनांचल क्षेत्र मन ला मुख्यधारा ले जोड़े बर सरलग उदीम करे जात हे। उमन कहिन के सरगुजा क्षेत्र के चउतरफा विकास, जनजातीय समाज के सशक्तिकरण अउ क्षेत्र के खुशहाली बर सरकार पूरा संकल्प के संग काम करत हे अउ सबो के सहयोग ले ए क्षेत्र ला प्रगति के नवा ऊँचाई तक पहुँचाय जाही।
बैठक म वित्तीय बछर 2025-26 बर प्राधिकरण बर 50 करोड़ रुपया के बजट प्रावधान ला मंजूरी दे गीस। क्षेत्रीय जनप्रतिनिधि मन कोति ले रखे गय प्रस्ताव के आधार म 543 विकास काम मन बर 4905.58 लाख रुपया के वित्तीय स्वीकृति दे गीस, जबकि बछर 2024-25 म मंजूर 606 काम मन ला घलो औपचारिक मंजूरी दे गीस। मुख्यमंत्री श्री साय ह सबो मंजूर काम मन ला तय समय म अउ बढ़िया गुणवत्ता के संग पूरा करे बर अउ रुके काम मन ला मार्च तक पूरा करे के निरदेस दीन। मुख्यमंत्री ह बैठक म साफ कहिन के पीये के पानी जइसे बुनियादी सुबिधा बर कोनो किसम के लापरवाही बर्दाश्त नइ करे जाय। ओमन गरमी के दिन म भरपूर पानी के बेवस्था ठउका करे के निरदेस दीन।
बैठक म बताय गीस के प्रधानमंत्री जनमन योजना के तहत मनेन्द्रगढ़-चिरमिरी-भरतपुर जिला के सोनहत विकासखंड म बिजली पहुँचाए के काम तेजी ले चलत हे। मुख्यमंत्री श्री साय ह अधिकारी मन ला कड़ा निरदेस दीन के मंजूर काम मन ला समय म अउ गुणवत्ता के संग पूरा करे जाय, ताकि विकास योजना मन के लाभ सीधा जनजातीय अउ वनांचल क्षेत्र के मनखे मन तक पहुँच सकय।
बैठक म मुख्यमंत्री ह प्रभावित क्षेत्र मन म हाईमास्ट सोलर लाइट लगाय, किसान मन के समस्या के समाधान करे, बिजली बिल के गलती मन ला सुधार करे अउ खराब निर्माण काम मन उपर कड़ा कार्रवाई करे के निरदेस दीन।
मुख्यमंत्री श्री साय ह कहिन के प्राधिकरण के पिछला बैठक जशपुर जिला के मयाली म होय रहिस, जेकर बाद मयाली के चिन्हारी पर्यटन केंद्र के रूप म बाढ़े हे। गोल्डन बुक ऑफ वर्ल्ड रिकॉर्ड्स म दुनिया के बड़े शिवलिंग ला जगा मिलिस अउ स्वदेश दर्शन योजना के तहत पईसा मंजूर होईस। ओमन कहिन के बैकुंठपुर म आयोजित ए बैठक ले घलो जिला के चिन्हारी अउ पर्यटन के संभावना ला बढ़ावा मिलही। उमन कहिन के झुमका जलाशय संग इहाँ पर्यटन के अगाध संभावना हे अउ अइसन अलग-अलग जिला मन म बैठक करे ले स्थानीय विकास ला गती मिलथे।
बैठक म कृषि मंत्री श्री रामविचार नेताम, प्राधिकरण के उपाध्यक्ष श्रीमती गोमती साय, खाद्य मंत्री श्री दयालदास बघेल, स्वास्थ्य मंत्री श्री श्याम बिहारी जायसवाल, महिला अऊ बाल विकास मंत्री श्रीमती लक्ष्मी राजवाड़े, पर्यटन अऊ संस्कृति मंत्री श्री राजेश अग्रवाल, स्कूल शिक्षा मंत्री श्री गजेन्द्र यादव, उद्योग मंत्री श्री लखनलाल देवांगन, सांसद श्री चिंतामणि महाराज, विधायक मन, वरिष्ठ अधिकारी अउ जनप्रतिनिधि मन उपस्थित रहिन।
