वैश्विक मंच म छत्तीसगढ़ – मुख्यमंत्री श्री साय के जापान दौरा बनिस तकनीकी अऊ औद्योगिक सहयोग के सेतु
रायपुर, ओसाका वर्ल्ड एक्सपो म छत्तीसगढ़ के भागीदारी के पहिली मुख्यमंत्री श्री विष्णु देव साय ह 22 अगस्त के टोक्यो प्रवास के शुरुआत आध्यात्मिकता, तकनीक अऊ व्यापार कूटनीति के संगम के संग करिन।
टोक्यो पहुंचतेच मुख्यमंत्री श्री साय ह ऐतिहासिक असाकुसा मंदिर के दर्शन करिन। ये टोक्यो के सबले जुन्ना अऊ प्रतिष्ठित मंदिर हे, जेन शांति अऊ सामर्थ्य के चिनहारी माने जाथे। मुख्यमंत्री श्री साय ह मंदिर म पूजा-अर्चना करके छत्तीसगढ़ के 3 करोड़ जनता के खुशहाली, समृद्धि अऊ सरलग प्रगति के कामना करिन। उमन कहिन के ये मंदिर जइसे शांति अऊ शक्ति के संदेश देथे, वइसनहे छत्तीसगढ़ के जनता घलोक छत्तीसगढ़ शांति, सामर्थ्य अऊ समृद्धि ले परिपूर्ण राज्य के रूप म सतत विकास कोति आगू बढ़इया राज्य बनय, ये बिनती करत हे।
सूचना प्रौद्योगिकी म नवाचार के दिशा म कदम
मुख्यमंत्री श्री साय के अगुवई म प्रतिनिधिमंडल ह एनटीटी लिमिटेड (NTT Ltd.) के मुख्य कार्यकारी अधिकारी सुश्री कायो इतो ले मुलाकात करिन। एनटीटी विश्व के शीर्ष आईटी इंफ्रास्ट्रक्चर अऊ डिजिटल समाधान कंपनी मन म ले एक हे, जेकर वार्षिक आय 90 अरब अमेरिकी डॉलर हे अऊ जेन 50 ले जादा देश म कार्यरत हे। ए बैठक म छत्तीसगढ़ म तकनीक आधारित निवेश के संभावना मन उपर चर्चा होइस। मुख्यमंत्री ह राज्य म डिजिटल इकोसिस्टम ल मजबूत बनाए उपर जोर दीन। एनटीटी विश्वभर म क्लाउड कम्प्यूटिंग अऊ साइबर सुरक्षा संग अत्याधुनिक आईटी समाधान देहे के काम करथे अऊ डिजिटल बदलाव के अग्रणी शक्ति हे।
सांस्कृतिक रिश्ता अऊ व्यापारिक साझेदारी ल मजबूती
संझा के भारत के जापान म राजदूत श्री सिबी जॉर्ज कोति ले आयोजित औपचारिक रात्रिभोज म मुख्यमंत्री श्री साय अऊ प्रतिनिधिमंडल ह भाग लीन। ए बेरा म होए चर्चा म इंडो-पैसिफिक देश मन ल उद्योग अऊ व्यापार के माध्यम ले जोड़े के जरूरत उपर बल देहे गीस। ये मां आर्थिक स्थिरता, व्यापारिक सुरक्षा, पारिस्थितिकीय संतुलन अऊ औद्योगिक बढ़ोतरी के अहम भूमिका ल रेखांकित करे गीस। मुख्यमंत्री श्री साय ह कहिन के जापान के उन्नत तकनीक अऊ भारत के कुशल जनशक्ति के संयोजन ले व्यापक औद्योगिक सहयोग के संभावना हे। उमन सांस्कृतिक संबंध मन ल प्रोत्साहित करे अऊ छत्तीसगढ़ ल जापानी पर्यटक मन बर आकर्षक पर्यटन गंतव्य के रूप म प्रस्तुत करे म घलोक जोर दीन।
वैश्विक सेतु निर्माण के दिशा म महत्वपूर्ण कदम
मुख्यमंत्री श्री साय अऊ ऊंखर प्रतिनिधिमंडल के ये पहिली दिन उपलब्धि मन ले परिपूर्ण रहिस। ये मां व्यापार, तकनीक अऊ कूटनीति ले जुड़े अहम अवसर के खोज करे गीस। ए उदीम मन ले छत्तीसगढ़ ल तीव्र औद्योगिक विकास, डिजिटल नवाचार अऊ वैश्विक साझेदारी के एक उभरत केंद्र के रूप म स्थापित करे के दिशा म ठोस कदम उठाए गीस।