मुख्यमंत्री विशेष स्वास्थ्य सहायता योजना ले जागत हे नवा जीवन आसरा
योजना ले मालखरौदा के उर्मिला के होवत हे कैंसर के फोकट म इलाज
रायपुर 25 नवंबर 2024
मुख्यमंत्री श्री विष्णु देव साय राज्य के नागरिक मन ल बने स्वास्थ्य सुविधा उपलब्ध कराए के उद्देश्य ले मुख्यमंत्री विशेष स्वास्थ्य सहायता योजना के अंतर्गत जरूरतमंद लोगन मन बर आर्थिक सहायता के स्वीकृति देवत हावय। गंभीर अउ दुर्लभ बीमारी मन के इलाज म होवइया खरचा ले बचाए खातिर संजीवनी सहायता कोष के विस्तार करत मुख्यमंत्री विशेष स्वास्थ्य सहायता योजना संचालित करे जावत हे । ये योजना ले प्रदेश के नागरिक लाभान्वित होवत हावय।
9 महीना योजना के अंतर्गत 1211 मामला म जरूरतमंद लोगन मन ल 43 करोड़ 16 लाख रूपए के आर्थिक सहायता के स्वीकृति मिल चुके हे।
ये योजना के अंतर्गत सक्ती जिला के मालखरौदा विकासखंड अंतर्गत अवइया गाँव परसा निवासी श्रीमती उर्मिला देवी सिदार पति स्व. श्री केदारनाथ सिदार के कैंसर के फोकट म इलाज चलत हावय। उर्मिला ह बताइस कि ओकर पति के मृत्यु होए के पीछु घर के आर्थिक स्थिति बने नइ होए के सेति वोहँ अपन ये गंभीर बीमारी के इलाज नइ करा पावत रिहिसे। फेर ओला मुख्यमंत्री विशेष स्वास्थ्य सहायता योजना के जानकारी मिलीस। त वोहँ मुख्यमंत्री विशेष स्वास्थ्य सहायता योजना के लाभ लेहे बर आवेदन करिस अउ जुलाई 2024 म सहायता राशि स्वीकृत होइस।
वर्तमान मे योजना के अंतर्गत उन्कर इलाज मेकाहारा हॉस्पिटल, रायपुर म फोकट म होवत हावय। श्रीमती उर्मिला देवी सिदार ह बताइस कि उन्कर कैंसर के इलाज बर हरेक 21 दिन म कीमोथेरेपी करे जावय संगे संग आने दवाईयां तको देहे जावत रिहिसे। उन मन बताइस कि यदि ओला मुख्यमंत्री विशेष स्वास्थ्य सहायता योजना के लाभ नइ मिल पातिस त शायद ही वोह अपन ये गंभीर बीमारी के इलाज करा पातीस।
श्रीमती उर्मिला ह ओकर जीवन म आए ये कठिन समय म छत्तीसगढ़ शासन कोति ले ओला ये योजना के माध्यम से सहयोग प्रदान करे खातिर धन्यवाद दिस हावय। उनमन प्रदेश के मुख्यमंत्री श्री विष्णु देव साय के हृदय ले आभार व्यक्त करीन हावय।
मुख्यमंत्री विशेष स्वास्थ्य सहायता योजना के अंतर्गत चिन्हित दुर्लभ बीमारी मन के ईलाज बर राज्य के पात्र परिवार मन ल अधिकतम 25 लाख रूपिया तक के फोकट म इलाज के सुविधा प्रदान करे जावत हे। छत्तीसगढ़ अइसन पहला राज्य हरे, जोन अतेक बड़का राशि राज्य के नागरिक मन के इलाज देवत हावय।