26/11 के अनसुने नायक मन ला सलाम : मुख्यमंत्री श्री साय ‘भारत भाग्य विधाता’ के प्री-लॉन्च स्क्रीनिंग म शामिल होइन

रायपुर, मुख्यमंत्री श्री विष्णु देव साय ह काली राजधानी रायपुर के जोरा मॉल म रखे गे ‘भारत भाग्य विधाता’ फिलिम के प्री-लॉन्च स्क्रीनिंग सेरेमनी म शामिल होइन। ए मौका म उमन के धर्मपत्‍नी श्रीमती कौशल्या साय अउ परिवार के लोगन मन घलो संग म रहिन। कार्यक्रम म जानेमाने अभिनेत्री अउ सांसद सुश्री कंगना रनौत, फिलिम के निरदेसक श्री मनोज तापड़िया सहित फिलिम जगत ले जुरे कलाकार, जनप्रतिनिधि अउ बड़ झन आम मनखे मन मौजूद रहिन।
मुख्यमंत्री श्री साय ह कहिन के ए छत्तीसगढ़ बर बड़ भाग के बात आय के सुश्री कंगना रनौत के फिलिम ‘भारत भाग्य विधाता’ के स्क्रीनिंग हमर राज्‍य म होत हे अउ ए बेरा म ओमन खुद इहां पधारे हें। ओमन कहिन के माता कौशल्या के जनम-भुइँया अउ भगवान श्रीराम के ननिहाल छत्तीसगढ़ म सुश्री कंगना रनौत के हिरदे ले सुवागत अउ अभिनंदन हे।
मुख्यमंत्री श्री साय ह फिलिम ले जुरे जम्मो कलाकार मन, तकनीकी बिसेसग मन अउ पूरा टीम ला बधाई-सुभकामना देवत कहिन के ए अइसन कहानी आय, जे ओ अनसुने अउ अनदेखे नायक मन ला मान-सनमान देथे, जेकर असाधारण मिहनत ला जादातर सही पहिचान नइ मिल पाय रहिस। ओमन कहिन के आज ए स्क्रीनिंग म सुश्री कंगना रनौत अउ ओकर टीम के संग स्‍वास्‍थ्‍य विभाग के बहिनी मन के मौजूदगी ए फिलिम के भावना ला अउ जादा सार्थक बनाथे।
मुख्यमंत्री श्री साय ह कहिन के ए गरब के बात आय के फिलिम के निरदेसक श्री मनोज तापड़िया छत्तीसगढ़ के माटी के बेटा आंय। उमन इहें जनम लिन, इहें पले-बढ़िन अउ बड़ समे तक मुंबई म रहिके ए जरूरी बिसय ऊपर आधारित फिलिम के कहानी ला लिखिन। मुख्यमंत्री ह कहिन कि 26 नवंबर 2008 के मुंबई म होय आतंकी हमला म पाकिस्तानी आतंकवादी मन डहर ले निरदोस लोगन ऊपर अंधाधुंध गोलीबारी करे गे राहिस, जेकर से कतको मनखे मन के जान चले गीस। ओ कठिन समे म अस्पताल मन म काम करत माइलोगन नर्स मन, डाक्टर मन अउ दूसर सेहत-करमी मन अपन परान के परवाह करे बिना सैकड़ों लोगन के जान बचाइन अउ घायल मन के सेवा करिन।
मुख्यमंत्री श्री साय ह कहिन के अइसन कतको जोधा होथें, जेकर कहानी मन समाज के आघू नइ आ पाय। सुश्री कंगना रनौत ह खुद नर्स के रोल करके ओ सेहत-करमी मन के साहस, सेवा अउ समर्पण के कहानी ला देस के आघू लाय के बड़का बूता करे हे। ओमन कहिन के दुनिया म कतको अइसन लोगन होथें, जे बड़का-बड़का काम कर जाथें, फेर ओमन ला सही पहिचान नइ मिल पाय। ए फिलिम अइसने लोगन मन ला समर्पित हे।
मुख्यमंत्री श्री साय ह कहिन के ए घलो बड़ भाग के बात आय क देस के सुघर प्रधानमंत्री श्री नरेंद्र मोदी ह ए फिलिम ला ‘भारत भाग्य विधाता’ नाम देहे हें। ओमन छत्तीसगढ़ के जनता डहर ले सुश्री कंगना रनौत, ओकर पूरा टीम अउ सेहत बिभाग ले जुरे जम्मो करमी मन ला बधाई अउ सुभकामना दीन।
ए मोका म अदभनेत्री अउ सांसद सुश्री कंगना रनौत ह कहिन के फिलिम के निरदेसक श्री मनोज तापड़िया छत्तीसगढ़ के भुइँया म जन्मे हें, इहें पले-बढ़े हें अउ ए राज के बेटा आंय। ओमन अरजी करे रहिन के फिलिम के स्क्रीनिंग छत्तीसगढ़ म रखे जाय त ए ओकर बर गरब के बात होही। सुश्री रनौत ह कहिन के मुख्यमंत्री श्री विष्णु देव साय ह अपन बड़ बियस्त काम मन के बीच ले समे निकाल के ए कार्यक्रम म शामिल होइन अउ कलाकार मन के संग पूरा टीम के मान बढ़ाके जम्मो के उछाह बढ़ाइन।
कार्यक्रम के बेरा म मुख्यमंत्री श्री विष्णु देव साय ह छत्तीसगढ़ म आपातकालीन समे म सबले सुघर सेवा देवइया ‘भारत भाग्य विधाता वॉरियर्स’ मन के सनमान करिन। सनमान पाये वाले मन म श्री जागेश्वर कुमार धीवर, श्री नारायण सिंह नायक, श्रीमती भुनेश्वरी तिवारी, श्रीमती रोहिणी वर्मा, श्रीमती उर्मिला भगत, श्रीमती रोशनी, श्री विजय शंकर कश्यप, श्रीमती मीना सिंह, श्रीमती ममता कपूर, श्रीमती मीना शर्मा, श्रीमती जमुनाबाई, श्रीमती लक्ष्मी मेनन अउ श्रीमती विजया लक्ष्मी पिल्लई सामिल हें।
ए मौका म मंत्त्रि-मंडल के सदस्य मन, सांसद श्री बृजमोहन अग्रवाल, सांसद श्रीमती लक्ष्मी वर्मा, सांसद श्रीमती रूप कुमारी चौधरी, बिधायक मन, जनप्रतिनिधि, फिलिम जगत ले जुरे कलाकार अउ बड़ संखिया म मीडिया के संगी मन उपस्थित रहिन।